धाराशिव : रात्रीच्या अंधारात महामार्गावरून धावणाऱ्या वाहनांतून शिताफीने सामानाची चोरी करणाऱ्या एका सराईत टोळीचा स्थानिक गुन्हे शाखेच्या (LCB) पथकाने अवघ्या २४ तासांत पर्दाफाश केला आहे. इंदापूर ते वाशी रस्त्यावर चालत्या पिकअपमधून तेलाचे डबे चोरणाऱ्या तीन आरोपींना पोलिसांनी बेड्या ठोकल्या असून, त्यांच्याकडून चोरीचा माल आणि गुन्ह्यात वापरलेली मोटारसायकल जप्त करण्यात आली आहे.
स्थानिक गुन्हे शाखेचे पथक धाराशिव शहरात मालमत्तेविषयीचे गुन्हे उघडकीस आणण्यासाठी पेट्रोलिंग करत होते. त्यावेळी पोलिसांना गुप्त बातमीदाराकडून माहिती मिळाली की, इंदापूर ते वाशी जाणाऱ्या रोडवर एका चालत्या पिकअपमधून काही जणांनी तेलाचे डबे चोरले आहेत आणि हा माल संतोष राजेंद्र शिंदे (रा. लक्ष्मी पारधी पिढी, तेरखेडा) याने त्याच्या घरी लपवून ठेवला आहे.
या माहितीच्या आधारे पथकाने संतोष शिंदे याचा शोध सुरू केला असता तो येरमाळा येथे मिळून आला. पोलिसांनी त्याला ताब्यात घेऊन घटनेबाबत चौकशी केली. सुरुवातीला त्याने उडवाउडवीची उत्तरे दिली, मात्र पोलिसांनी विश्वासात घेऊन सखोल चौकशी केली असता त्याने गुन्ह्याची कबुली दिली. आपण आणि आपले साथीदार पापा शंकर पवार (रा. लक्ष्मी पारधी पिढी, तेरखेडा) व आकाश देवीदास शिंदे (रा. पारा) अशा तिघांनी मिळून रात्रीच्या वेळी चालत्या पिकअपमध्ये चढून तेलाचे ४ डबे चोरल्याचे त्याने सांगितले.
आरोपीच्या माहितीवरून पोलिसांनी त्याच्या घरातून ८,९६० रुपये किमतीचे तेलाचे ४ डबे आणि गुन्ह्यात वापरलेली रेडीऑन कंपनीची मोटारसायकल (चेसी नं. MD625BK627MIA01176) असा एकूण ६३,९६० रुपयांचा मुद्देमाल जप्त केला आहे. अटक करण्यात आलेल्या तिन्ही आरोपींना पुढील कायदेशीर कारवाईसाठी वाशी पोलीस ठाण्याच्या ताब्यात देण्यात आले आहे.
सदरची उल्लेखनीय कामगिरी पोलीस अधीक्षक श्रीमती रितु खोखर आणि अपर पोलीस अधीक्षक श्रीमती शफकत आमना यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विनोद इज्जपवार यांच्या आदेशावरून सहाय्यक पोलीस निरीक्षक सचिन खटके, पोलीस हवालदार विनोद जानराव, नितीन जाधवर, बबन जाधवर आणि चालक पोलीस अमंलदार रोहीत दंडनाईक यांच्या पथकाने ही कारवाई यशस्वीपणे पार पाडली.
