धाराशिव: येथील देवकते गल्लीत आर्थिक व्यवहाराच्या कारणावरून झालेल्या वादातून एका ३२ वर्षीय तरुणाला आठ जणांनी मिळून बेदम मारहाण केल्याची धक्कादायक घटना समोर आली आहे. या मारहाणीत फिर्यादी महेश दिलीप महानवर यांचा पुढचा दात तुटला असून, त्यांना गंभीर दुखापत झाली आहे. ही घटना १९ सप्टेंबर रोजी सकाळी ११ ते ११.३0 च्या सुमारास घडली.
याप्रकरणी महेश महानवर यांनी दिलेल्या फिर्यादीनुसार, धाराशिव शहर पोलीस ठाण्यात तानाजी उर्फ नन्नु किसन देवकते, आकाश पोपट देवकते, धनाजी किसन देवकते, अभिषेक तानाजी देवकते, शुभम राजेंद्र देवकते, ओमकार दिलीप देवकते, सुरज बाबा देवकते आणि रवि पांडुरंग देवकते या आठ आरोपींविरुद्ध गुन्हा दाखल करण्यात आला आहे. सर्व आरोपी देवकते गल्ली, वैराग रोड, धाराशिव येथील रहिवासी आहेत.
पोलिसांनी दिलेल्या माहितीनुसार, फिर्यादी महेश महानवर आणि आरोपी यांच्यात आर्थिक व्यवहारावरून वाद होता. घटनेच्या दिवशी, १९ सप्टेंबर रोजी सकाळी देवकते गल्लीतील समाज मंदिरासमोर आरोपींनी गैरकायदेशीरपणे गर्दी जमवून महानवर यांना शिवीगाळ करण्यास सुरुवात केली. त्यानंतर लाथाबुक्क्यांनी आणि काठीने त्यांना बेदम मारहाण केली. या हल्ल्यात महानवर यांचा पुढचा दात तुटून ते गंभीर जखमी झाले. तसेच, आरोपींनी त्यांना जीवे मारण्याची धमकीही दिली.
या घटनेनंतर महानवर यांनी वैद्यकीय तपासणी करून २४ सप्टेंबर रोजी धाराशिव शहर पोलीस ठाण्यात जबाब नोंदवला. त्यांच्या जबाबावरून पोलिसांनी आठही आरोपींविरुद्ध भारतीय न्याय संहिता कलम १८९ (२), १९१ (२), १९१(३), १९०, ११७(२), ११८(१), ११५(२), ३५२, ३५१(२) अन्वये गुन्हा नोंदवला असून, पोलीस पुढील तपास करत आहेत.
