धाराशिव : मद्यधुंद अवस्थेत निष्काळजीपणे मोटरसायकल चालवत सार्वजनिक ठिकाणी आरडाओरड करणे एका तरुणाला चांगलेच महागात पडले आहे. याप्रकरणी आनंदनगर पोलिसांनी स्वतः फिर्याद देऊन संबंधित तरुणाविरोधात गुन्हा दाखल केला आहे.
सचिन प्रविण धारुरकर (वय २९, रा. तिरुपती कॉलनी, भवानी चौक, सांजा रोड, धाराशिव) असे गुन्हा दाखल झालेल्या तरुणाचे नाव आहे.
पोलिसांनी दिलेल्या माहितीनुसार, सचिन धारुरकर हा २२ जून रोजी रात्री साडेदहा वाजण्याच्या सुमारास आपल्या ताब्यातील मोटरसायकल (क्र. एमएच २५ जे ६६४८) आनंदनगर पोलीस ठाण्याच्या हद्दीत चालवत होता. यावेळी तो मद्यधुंद अवस्थेत होता आणि बेदरकारपणे गाडी चालवत मोठ्याने आरडाओरड करून सार्वजनिक शांततेत अडथळा निर्माण करत होता.
हा प्रकार गस्तीवर असलेल्या पोलिसांच्या निदर्शनास आला. पोलिसांनी तात्काळ कारवाई करत सचिन धारुरकर याच्याविरोधात मोटार वाहन कायद्याच्या कलम १८५ आणि ८५(१) चे उल्लंघन केल्याप्रकरणी आनंदनगर पोलीस ठाण्यात गुन्हा नोंदवला आहे.
मद्यधुंद अवस्थेत हायवेवर कार चालवणाऱ्या आंध्रप्रदेशच्या चालकावर गुन्हा दाखल
उमरगा : सोलापूर-हैद्राबाद राष्ट्रीय महामार्गावर मद्यधुंद अवस्थेत निष्काळजीपणे आणि धोकादायकरित्या कार चालवणाऱ्या आंध्रप्रदेशातील एका चालकावर उमरगा पोलिसांनी गुन्हा दाखल केला आहे. ही कारवाई २२ जून रोजी रात्री करण्यात आली.
मुल्ला व्यंकटा नरसिमा रेड्डी (वय ३५, रा. रामारेड्डी अकावेडी, प्रकाशराम, आंध्रप्रदेश) असे गुन्हा दाखल झालेल्या आरोपी चालकाचे नाव आहे.
पोलिसांनी दिलेल्या माहितीनुसार, २२ जून रोजी रात्री पावणेअकरा वाजण्याच्या सुमारास आरोपी मुल्ला रेड्डी हा आपल्या ताब्यातील बलेनो कार (क्र. एमएच १२ आर.के. ६८७४) घेऊन सोलापूरहून हैद्राबादच्या दिशेने जात होता. जकेकुर गावाजवळ महामार्गावर तो अत्यंत निष्काळजीपणे आणि मद्यधुंद अवस्थेत गाडी चालवत असल्याचे गस्तीवरील पोलिसांच्या निदर्शनास आले.
त्याच्या या धोकादायक कृत्यामुळे इतर वाहनचालकांच्या जीवितास धोका निर्माण होण्याची शक्यता होती. पोलिसांनी तात्काळ त्याला थांबवून कारवाई केली. याप्रकरणी पोलिसांनी स्वतः सरकारतर्फे फिर्याद देऊन आरोपी मुल्ला रेड्डी याच्या विरोधात मोटार वाहन कायद्याच्या कलम १८५ अन्वये उमरगा पोलीस ठाण्यात गुन्हा नोंदवला आहे. पुढील तपास सुरू आहे.
