धाराशिव: शहरातल्या गाझी हॉटेलजवळ एका पत्र्याच्या शेडमध्ये सुरू असलेल्या तिरट मटका जुगार अड्ड्यावर पोलिसांनी छापा टाकत १० जणांना ताब्यात घेतले आहे. त्यांच्याकडून १० लाख ५८ हजार १८५ रुपयांचा मुद्देमाल जप्त करण्यात आला आहे.
पोलीस अधीक्षक श्रीमती शफकत आमना यांना मिळालेल्या गोपनीय माहितीच्या आधारे ही कारवाई करण्यात आली. नॅशनल हायवे ५२ जवळील भवानी चौक ते अहिल्यादेवी होळकर चौकाकडे जाणाऱ्या रस्त्यालगत असलेल्या गाझी हॉटेलच्या बाजूला एका पत्र्याच्या शेडमध्ये काही इसम तिरट मटका नावाचा जुगार खेळत व खेळवत असल्याची माहिती त्यांना मिळाली होती.
या माहितीच्या आधारावर, पोलीस अधीक्षक कार्यालयाचे वाचक श्री. हिंगोले, पोलीस हवालदार तांबे, शेख, लोखंडे, भोजगुडे आणि क्यू.आर.टी. पथकाने नमूद ठिकाणी छापा टाकला. यावेळी काही जण गोलाकार बसून तिरट मटका खेळताना आढळून आले.
पोलिसांनी सर्फराज मकसुद कुरेशी, जुबेर जमील शेख, श्रीकांत बाबासाहेब शिंदे, पाशा कमाल पटेल, अजमतुल्ला जब्बार शेख, अमोल प्रकाश देढे, अमीर करीम सय्यद, सागर मारुती भांडवले, आबेद अब्दुल करीम शेख आणि रविंद्र मैंदाड (सर्व रा. धाराशिव) यांना ताब्यात घेतले. त्यांच्याकडून रोख रक्कम, मोबाईल फोन, वाहने आणि जुगाराचे साहित्य असा एकूण १०,५८,१८५ रुपयांचा मुद्देमाल जप्त करण्यात आला.
याप्रकरणी सर्व आरोपींविरुद्ध धाराशिव शहर पोलीस ठाण्यात महाराष्ट्र जुगार कायदा कलम ४ आणि ५ अन्वये गुन्हा नोंदवण्यात आला आहे. ही यशस्वी कामगिरी पोलीस अधीक्षक श्रीमती शफकत आमना यांच्या मार्गदर्शनाखाली विशेष पथकाने पार पाडली.
