धाराशिव: जिल्ह्यात चोरीच्या घटनांमध्ये वाढ झाली असून, चोरट्यांनी पोलिसांपुढे आव्हान उभे केले आहे. लोहारा तालुक्यात दिवसाढवळ्या रस्त्यावरून दुचाकी चोरल्याची घटना घडली आहे, तर परंडा तालुक्यात बंद घराचे कुलूप तोडून अज्ञात चोराने रोकड लंपास केली आहे. या दोन्ही घटनांप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
लोहारा: रस्त्यावरून मोटारसायकल चोरीला
पहिल्या घटनेत, सचिन शिवाजी इंगळे (वय ३९, रा. माकणी, ता. लोहारा) यांची हिरो स्पेलंडर प्लस कंपनीची मोटारसायकल (क्र. MH 25 AA 6938) चोरीला गेली आहे. ५ जून २०२५ रोजी सकाळी ११ वाजण्याच्या सुमारास इंगळे यांनी आपली २५,००० रुपये किमतीची दुचाकी माकणी ते सास्तूर जाणाऱ्या रस्त्यावर उभी केली होती. अज्ञात चोरट्याने संधी साधून ती चोरून नेली. याप्रकरणी सचिन इंगळे यांनी दिलेल्या तक्रारीवरून लोहारा पोलीस ठाण्यात भारतीय न्याय संहितेच्या कलम ३०३(२) नुसार गुन्हा नोंदवण्यात आला आहे.
परंडा: बंद घरातून १२ हजारांची रोकड लंपास
दुसरी घटना परंडा तालुक्यातील खानापूर येथील कुदळे वस्ती येथे घडली. नाना शंकर जाधव (वय ६०) हे ३१ मे २०२५ रोजी दुपारी साडेचार वाजण्याच्या सुमारास आपल्या घराला कुलूप लावून कामासाठी बाहेर गेले होते. हीच संधी साधून अज्ञात चोराने त्यांच्या घरातील १२,००० रुपयांची रोख रक्कम चोरून नेली. ५ जून रोजी नाना जाधव यांनी परंडा पोलीस ठाण्यात तक्रार दाखल केली. त्यांच्या तक्रारीवरून पोलिसांनी भारतीय न्याय संहितेच्या कलम ३०५(अ) अन्वये अज्ञात चोराविरुद्ध गुन्हा दाखल केला असून, दोन्ही प्रकरणांचा पुढील तपास पोलीस करत आहेत.
