धाराशिव: धाराशिव शहरात मागील भांडणाचे कारणावरून दोघांवर जीवघेणा हल्ला झाल्याची घटना घडली आहे. या प्रकरणी धाराशिव शहर पोलीस ठाण्यात अनिकेत तुकाराम जाधवसह सात जणांवर गुन्हा दाखल करण्यात आला आहे.
पोलिसांनी दिलेल्या माहितीनुसार, राजदुत शिवाजीराव आडे (वय ४४, रा. बोंबले हणुमान चौक, धाराशिव) हे १३ डिसेंबर रोजी दुपारी २ वाजून १० मिनिटांनी निरामय हॉस्पिटल समोरून जात असताना आरोपींनी त्यांना अडवले. मागील भांडणाचा राग मनात धरून आरोपींनी आडे यांना शिवीगाळ करत लाथाबुक्यांनी, रॉड, चाकू आणि कत्तीने मारहाण केली. आडे यांना वाचवण्यासाठी आकाश राठोड धावून आला असता आरोपींनी त्यालाही मारहाण केली.
या हल्ल्यात आडे आणि राठोड हे दोघेही गंभीर जखमी झाले आहेत. आरोपींनी त्यांना जीवे मारण्याची धमकी दिली आहे. राजदुत आडे यांच्या फिर्यादीवरून धाराशिव शहर पोलीस ठाण्यात भादंवि कलम १०९, ११८(२), ११८(१), ३५२, ३५१(२), १८९(२), १९१(२), १९१(३), १९० अन्वये गुन्हा दाखल करण्यात आला आहे.
