धाराशिव: राज्यातील नगरपरिषद आणि नगरपंचायतींच्या विकासासाठी राबविण्यात येणाऱ्या “वैशिष्ट्यपूर्ण” योजनेअंतर्गत, महाराष्ट्र शासनाने “नमो उद्यान” विकसित करण्यासाठी निधी मंजूर केला आहे. १७ सप्टेंबर, २०२५ रोजी नगर विकास विभागाने काढलेल्या शासन निर्णयानुसार, धाराशिव जिल्ह्यातील ८ नगरपालिका आणि २ नगरपंचायतींना प्रत्येकी १ कोटी रुपयांप्रमाणे एकूण १० कोटी रुपयांचा निधी मंजूर करण्यात आला आहे.
या निर्णयामुळे जिल्ह्यातील शहरांमध्ये नागरिकांसाठी उच्च दर्जाची उद्याने उपलब्ध होणार असून शहरांच्या सौंदर्यीकरणात मोठी भर पडणार आहे.
काय आहे ‘नमो उद्यान’ योजना?
राज्यातील नगरपरिषदा व नगरपंचायतींमध्ये उत्कृष्ट उद्यान विकसित करून नागरिकांना चांगल्या सुविधा उपलब्ध करून देण्याच्या उद्देशाने ही योजना सुरू करण्यात आली आहे. या अंतर्गत विकसित करण्यात येणाऱ्या उद्यानांना “नमो उद्यान” असे नाव देण्यात येणार आहे. या योजनेसाठी प्रत्येक नगरपरिषद आणि नगरपंचायतीला १ कोटी रुपयांचा निधी देण्यात येत आहे.
विशेष म्हणजे, या योजनेअंतर्गत विकसित झालेल्या उद्यानांची विभागीय स्तरावर स्पर्धा आयोजित केली जाणार आहे. या स्पर्धेत:
- प्रथम क्रमांक पटकावणाऱ्या नगरपरिषदेला “वैशिष्ट्यपूर्ण” योजनेतून ५ कोटी रुपयांची अतिरिक्त कामे मंजूर केली जातील.
- द्वितीय क्रमांकासाठी ३ कोटी रुपये मंजूर केले जातील.
- तृतीय क्रमांकासाठी २ कोटी रुपयांची कामे मंजूर करण्यात येतील.
जिल्ह्यातील ‘या’ शहरांना मिळाला निधी
शासनाच्या या निर्णयामुळे धाराशिव जिल्ह्यातील खालील नगरपरिषदा आणि नगरपंचायतींना प्रत्येकी १ कोटी रुपयांचा निधी मिळणार आहे:
नगरपरिषद:
- धाराशिव
- परांडा
- भूम
- कळंब
- तुळजापूर
- नळदूर्ग
- मुरुम
- उमरगा
नगरपंचायत:
- वाशी
- लोहारा
या निधीमुळे जिल्ह्यातील नागरिकांना लवकरच सुसज्ज आणि सुंदर ‘नमो उद्यान’ उपलब्ध होण्याची अपेक्षा आहे. या प्रकल्पाची अंमलबजावणी करण्याची जबाबदारी संबंधित नगरपरिषदेची असेल आणि हा प्रकल्प १०० टक्के शासन अनुदानाचा आहे.
