वाशी/येरमाळा: घराच्या बांधकामासाठी माहेरहून पैसे आण, या कारणावरून होणाऱ्या सततच्या शारीरिक व मानसिक छळाला कंटाळून एका ३३ वर्षीय विवाहितेने विहिरीत उडी मारून आपले जीवन संपवल्याची हृदयद्रावक घटना धाराशिव जिल्ह्यातील वाशी तालुक्यात घडली आहे. या प्रकरणी मयत महिलेच्या पतीविरुद्ध येरमाळा पोलीस ठाण्यात गुन्हा दाखल करण्यात आला आहे.
शिला राजेंद्र वाघमारे (वय ३३, रा. तेरखेडा, ता. वाशी) असे आत्महत्या केलेल्या विवाहितेचे नाव आहे. पोलिसांनी दिलेल्या माहितीनुसार, शिला यांनी ३० जुलै २०२५ रोजी दुपारी साडेबाराच्या सुमारास तेरखेडा शिवारातील एका शेतातील विहिरीत उडी मारून आत्महत्या केली.
याप्रकरणी मयत शिला यांचे माहेरकडील नातेवाईक रवी आनंद कुसंगवाड (वय २९, रा. जालना) यांनी २ ऑगस्ट २०२५ रोजी येरमाळा पोलीस ठाण्यात फिर्याद दिली आहे. फिर्यादीनुसार, आरोपी पती राजेंद्र कल्याण वाघमारे हा गेल्या सहा महिन्यांपासून घराचे बांधकाम करण्यासाठी माहेरहून पैसे घेऊन ये म्हणून शिला यांचा शारीरिक व मानसिक छळ करत होता. पतीच्या याच त्रासाला कंटाळून शिला यांनी आत्महत्येचे टोकाचे पाऊल उचलले, असे फिर्यादीत म्हटले आहे.
प्राप्त तक्रारीवरून, येरमाळा पोलिसांनी आरोपी पती राजेंद्र वाघमareविरुद्ध भारतीय न्याय संहिता कलम १०८, ८० आणि ८५ अन्वये गुन्हा नोंदवला आहे. या घटनेमुळे परिसरात हळहळ व्यक्त होत असून, पोलीस पुढील तपास करत आहेत.
