धाराशिव: धाराशिव शहरात एका ३५ वर्षीय महिलेवर लैंगिक अत्याचार करून, तिला जातीवाचक शिवीगाळ करत दांड्याने मारहाण केल्याची धक्कादायक घटना घडली आहे. याप्रकरणी धाराशिव शहर पोलीस ठाण्यात एका तरुणासह इतर आरोपींविरुद्ध गुन्हा दाखल करण्यात आला आहे. पीडित महिलेने दिलेल्या तक्रारीनुसार, ही घटना २५ मे २०२५ रोजी दुपारी १२.०० ते सायंकाळी ७.३० वाजेच्या सुमारास घडली.
पोलिसांनी दिलेल्या माहितीनुसार, पीडित महिला (नाव व गाव गोपनीय) घरी एकटी असताना गावातीलच एका तरुणाने तिला फोन केला. “मला तुला भेटायचे आहे, तू जर मला भेटली नाहीस तर मी फाशी घेईन,” अशी धमकी देत त्याने महिलेला बोलावून घेतले. त्यानंतर आरोपी तरुणाने तिच्यावर लैंगिक अत्याचार केला.
याशिवाय, इतर आरोपींनी पीडित महिलेस जातीवाचक शिवीगाळ करून तिला दांड्याने मारहाण केल्याचेही पीडितेने आपल्या तक्रारीत म्हटले आहे.
या घटनेप्रकरणी पीडित महिलेने २६ मे २०२५ रोजी धाराशिव शहर पोलीस ठाण्यात फिर्याद दिली. पोलिसांनी भारतीय न्याय संहिता (भा.न्या.सं.) कलम ६४(१) (लैंगिक अत्याचार), १२६(२) (धमकी देणे), ११८(१) (मारहाण करणे), ३५२, ३५१(२), ३(५) तसेच अनुसूचित जाती जमाती अत्याचार प्रतिबंधक कायद्याच्या (अ.जा.ज.प्र.का.) कलम ३(१)(ई), (आर), (एस), (डब्ल्यु)(i)(ii) अन्वये गुन्हा नोंदवला आहे. पोलीस या प्रकरणाचा अधिक तपास करत आहेत.
