उमरगा – तालुक्यातील डिग्गी गावाने दारूच्या विळख्यातून मुक्त होण्याचा निर्णय घेतला आहे! आज झालेल्या ग्रामसभेत दारुबंदीचा ठराव बहुमताने मंजूर करण्यात आला आहे. गावातील वाढत्या अवैध दारू विक्रीमुळे होणारे सामाजिक आणि कौटुंबिक प्रश्न यापुढे खपवून घेणार नाही, असा निर्धार गावकऱ्यांनी केला आहे.
साडेतीन हजार लोकसंख्येच्या या गावात अवैध दारू विक्रीमुळे सामाजिक आणि कौटुंबिक समस्या वाढत चालल्या होत्या. या समस्येवर तोडगा काढण्यासाठी माजी तंटा मुक्त अध्यक्ष विरेश जमादार यांनी काही दिवसांपूर्वी ग्रामपंचायत समोर आमरण उपोषण केले होते.
- अवैध दारू विक्रीविरोधात गाव एकवटले
- ग्रामसभेत दारुबंदीच्या बाजूने बहुमत
- महिलांचा दारुबंदीला पाठिंबा
- पोलिसांकडून अवैध धंद्यांवर कारवाईचे आश्वासन
आजच्या ग्रामसभेत सरपंच आशाताई लिंबारे यांच्या अध्यक्षतेखाली दारुबंदीच्या मागणीसाठी मतदान घेण्यात आले. यावेळी एकूण २२२ मते पडली, त्यापैकी १६५ मते दारुबंदीच्या बाजूने पडली तर ५७ मते दारूच्या बाजूने पडली. या ग्रामसभेला उमरगा पोलीस स्टेशनच्या पोलीस निरीक्षक अश्विनी भोसले आणि दारुबंदी अधिकारी देखील उपस्थित होते.
गावातील बहुसंख्य महिलांनी दारुबंदीच्या बाजूने आवाज उठवला होता. ठराव आता जिल्हाधिकाऱ्यांकडे पाठवण्यात येणार असून, तोपर्यंत गावात अवैध धंदे चालू देणार नाही, असे आश्वासन पोलीस निरीक्षक अश्विनी भोसले यांनी दिले आहे.
डिग्गी गावाच्या या निर्णयामुळे इतर गावांना देखील दारूबंदीच्या दिशेने पाऊल उचलण्याची प्रेरणा मिळेल, अशी आशा व्यक्त केली जात आहे.
