कळंब : कळंब शहरात एका तरुणाला जातीवाचक शिवीगाळ करत जीवे मारण्याच्या उद्देशाने प्राणघातक हल्ला केल्याची धक्कादायक घटना घडली आहे. याप्रकरणी कळंब पोलीस ठाण्यात एका व्यक्तीविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, धनेश इंदर ताटे (वय ३५ वर्षे, रा. साठेनगर, कळंब) यांनी या प्रकरणी फिर्याद दिली आहे. मंगळवार, दिनांक १५ सप्टेंबर २०२५ रोजी रात्री साडेनऊ वाजण्याच्या सुमारास शहरातील अण्णाभाऊ साठे चौकातील एका अंडा आम्लेटच्या गाड्याशेजारी ही घटना घडली.
फिर्यादी धनेश ताटे यांनी आरोपी आकाश भागवत चोंदे (रा. कळंब) याला “माझ्या चुलत भावाला का मारले?” अशी विचारणा केली. या क्षुल्लक कारणावरून संतापलेल्या आरोपीने धनेश ताटे यांना जातीवाचक शिवीगाळ करण्यास सुरुवात केली. त्यानंतर लाथाबुक्यांनी, लोखंडी टेबल आणि कटरने मारहाण करून त्यांना गंभीर जखमी केले व जीवे मारण्याची धमकी दिली.
या घटनेनंतर धनेश ताटे यांनी १६ सप्टेंबर रोजी कळंब पोलीस ठाण्यात फिर्याद दाखल केली. त्यांच्या तक्रारीवरून पोलिसांनी आरोपी आकाश चोंदे विरोधात भारतीय न्याय संहिता कलम १०९, ११८(१), ११८(२), ३५१(३) आणि अनुसूचित जाती-जमाती अत्याचार प्रतिबंधक कायद्यान्वये गुन्हा नोंदवला आहे. पोलीस या प्रकरणाचा अधिक तपास करत आहेत.
