धाराशिव – धाराशिव तालुक्यातील तोरंबा येथे जुन्या भांडणाच्या कारणावरून एका ५७ वर्षीय महिलेला आणि भांडण सोडवण्यासाठी गेलेल्या तिच्या जाऊला पाच जणांनी मिळून मारहाण केल्याची घटना उघडकीस आली आहे. याप्रकरणी बेंबळी पोलीस ठाण्यात पाच आरोपींविरुद्ध गुन्हा नोंदवण्यात आला आहे.
पोलिसांकडून मिळालेल्या माहितीनुसार, फिर्यादी अर्चना बळभीम गायकवाड (वय ५७ वर्षे, रा. तोरंबा, ता. जि. धाराशिव) यांनी १ मे २०२५ रोजी बेंबळी पोलीस ठाण्यात तक्रार दाखल केली. त्यांच्या तक्रारीनुसार, २७ एप्रिल २०२५ रोजी रात्री सुमारे १० वाजता (२२:०० वा.) तोरंबा गावात ही घटना घडली.
आरोपी विष्णू दासू गायकवाड, लक्ष्मी विष्णू गायकवाड, नारायण विष्णू गायकवाड, अर्चना नारायण गायकवाड (सर्व रा. तोरंबा) आणि अनिकेत कमलाकर शिंदे (रा. कदमवाडी, ता. तुळजापूर, जि. धाराशिव) यांनी मागील भांडणाचा राग मनात धरून गैरकायदेशीर जमाव जमवला. त्यांनी फिर्यादी अर्चना गायकवाड यांना शिवीगाळ करत लाथाबुक्क्यांनी आणि काठीने मारहाण करून जखमी केले.
यावेळी, फिर्यादीची जाऊ प्रभावती गायकवाड या भांडण सोडवण्यासाठी मध्ये गेल्या असता, आरोपींनी त्यांनाही शिवीगाळ करून मारहाण केली. तसेच, आरोपींनी जीवे ठार मारण्याची धमकी दिल्याचेही फिर्यादीत नमूद करण्यात आले आहे.
अर्चना गायकवाड यांनी दिलेल्या फिर्यादीवरून बेंबळी पोलिसांनी पाचही आरोपींविरुद्ध भारतीय न्याय संहिता (भा.न्या.सं.) कलम ११८(१), ११५(२), १८९(२), १९१(२), १९१(३), १९०, ३५२, ३५१(२)(३) अन्वये गुन्हा नोंदवला आहे. पोलीस या घटनेचा पुढील तपास करत आहेत.
