धाराशिव – धाराशिव जिल्ह्यातील स्थानिक गुन्हे शाखेच्या पथकाने आनंदनगर पोलीस ठाण्यातील मालाविषयक गुन्ह्यातील फरार आरोपी अजित धनाजी बोंदर (वय 26, रा. उत्तमी कायापुर) यास वडगाव सिध्देश्वर येथील त्याच्या शेतातून अटक केली आहे.
पोलीस अधीक्षक अतुल कुलकर्णी आणि अपर पोलीस अधीक्षक गौहर हसन यांच्या मार्गदर्शनाखाली पोलीस निरीक्षक वासुदेव मोरे यांच्या नेतृत्वाखालील पथकाने ही कामगिरी बजावली. या पथकात सपोनि अमोल मोरे, सचिन खटके, पोह/1166 हुसेन सय्यद, पोह/327 जानराव, पोना/1611 जाधवर, पोअं/1819 रवींद्र आरसेवाड आणि चालक पोह/583 चौरे यांचा समावेश होता.
पथक नेहमीप्रमाणे मालाविषयक गुन्ह्यांतील आरोपींचा शोध घेत असताना वडगाव सिध्देश्वर परिसरात गस्त घालत होते. त्यावेळी पथकाला गुप्त बातमी मिळाली की, आनंदनगर पोलीस ठाण्यात दाखल असलेल्या गु.र.नं. 219/2024 कलम 262 बीएनएस अंतर्गत फरार असलेला आरोपी अजित बोंदर हा त्याच्या शेतात लपून बसला आहे.
या माहितीवरून पोलिसांनी तात्काळ कारवाई करत आरोपीच्या शेतावर छापा टाकला. आरोपी अजित बोंदर शेतात असल्याचे निदर्शनास आल्यावर पोलिसांनी त्याला घेराव घालून पकडले. आरोपीकडे चौकशी केल्यानंतर त्याने गुन्ह्याची कबुली दिली. त्यानंतर पोलिसांनी त्याला ताब्यात घेतले.पोलिसांनी आरोपी अजित बोंदर याला पुढील तपासासाठी आनंदनगर पोलीस ठाण्याच्या ताब्यात दिले आहे.
