तुळजापूर : तुळजापूर तालुक्यातील सावरगाव येथील एका एचपी गॅस वितरकाने थेट कंपनीच्या व्हिडिओ कॉन्फरन्सिंग (व्हीसी) बैठकीतच आत्महत्येचा प्रयत्न केल्याची धक्कादायक घटना समोर आली आहे. ज्ञानेश्वर माळी असे या वितरकाचे नाव असून, त्यांची प्रकृती गंभीर असल्याने त्यांना उपचारासाठी सोलापूर येथील खाजगी रुग्णालयात दाखल करण्यात आले आहे. या घटनेमुळे संपूर्ण धाराशिव जिल्ह्यात एकच खळबळ उडाली आहे.
सध्या आखाती युद्धामुळे धाराशिव जिल्ह्यात गॅसची मोठी टंचाई निर्माण झाली आहे. या टंचाईच्या पार्श्वभूमीवर ग्राहकांच्या वाढत्या मागणीमुळे वितरणावर मोठा ताण होता. याच तणावातून माळी यांनी हे टोकाचे पाऊल उचलल्याची प्राथमिक चर्चा परिसरात आहे. मात्र, या प्रकरणाला गैरव्यवहाराची दुसरी किनार असल्याचेही तपासात समोर येत आहे.
स्टॉकमध्ये तफावत आणि गॅसचा काळाबाजार
प्राप्त माहितीनुसार, एचपी कंपनीच्या अधिकाऱ्यांनी नुकतीच सावरगाव येथील गॅस एजन्सीची तपासणी केली होती. या तपासणीत प्रत्यक्ष साठा (स्टॉक) आणि गॅस वितरण यामध्ये मोठी तफावत आढळून आली. या वितरकाने तब्बल १२०० गॅस सिलिंडरचा घोळ घातला असून, सुमारे सात लाख रुपये किमतीचे गॅस सिलिंडर काळ्या बाजारात (ब्लॅकमध्ये) विकल्याची धक्कादायक माहिती समोर आली आहे.
पुरवठा केला होता बंद
या आर्थिक गैरव्यवहारामुळे आणि मागील अनेक दिवसांपासून त्यांच्याकडे कंपनीची मोठी वसुली (रिकव्हरी) प्रलंबित असल्याने, कंपनीने त्यांच्या एजन्सीचा गॅस पुरवठा बंद केला होता. याच पार्श्वभूमीवर एचपी कंपनीची व्हिडिओ कॉन्फरन्सिंगद्वारे बैठक सुरू होती. या बैठकीतच आलेल्या तणावातून ज्ञानेश्वर माळी यांनी आत्महत्येचा प्रयत्न केला.
पोलिसांचा तपास सुरू
घटनेची माहिती मिळताच तामलवाडी पोलिसांनी तातडीने घटनास्थळी धाव घेतली. माळी यांना तातडीने उपचारासाठी सोलापूरला हलवण्यात आले आहे. जिल्ह्यात आधीच गॅस टंचाईची ओरड असताना, गॅसचा काळाबाजार उघडकीस आल्याने आणि थेट कंपनीच्या बैठकीत वितरकाने आत्महत्येचा प्रयत्न केल्याने ग्राहकांमध्ये व प्रशासनात मोठी खळबळ उडाली आहे. तामलवाडी पोलीस या संपूर्ण प्रकरणाचा अधिक तपास करत आहेत.
ठळक घडामोडी :
-
ठिकाण: सावरगाव, ता. तुळजापूर
-
घटनेचे स्वरूप: गॅस वितरक ज्ञानेश्वर माळी यांचा व्हिडिओ कॉन्फरन्सिंगमध्ये आत्महत्येचा प्रयत्न.
-
कारवाई: तामलवाडी पोलिसांकडून तपास सुरू; माळी यांच्यावर सोलापूर येथे उपचार सुरू.
-
आरोप: १२०० सिलिंडरचा घोळ, ७ लाखांच्या गॅसचा काळाबाजार केल्याचा संशय.
