येरमाळा : कत्तलीच्या उद्देशाने टेम्पोमधून गायींची निर्दयपणे आणि बेकायदेशीर वाहतूक करणाऱ्या एका व्यक्तीवर येरमाळा पोलिसांनी गुन्हा दाखल केला आहे. पोलिसांनी टेम्पोसह ९ गायी असा एकूण ५ लाख ६ हजार रुपयांचा मुद्देमाल जप्त केला आहे. ही कारवाई गुरुवारी (दि. १० एप्रिल २०२५) पहाटे पावणेसहा वाजण्याच्या सुमारास कळंब रोडवरील येरमाळा पुलाजवळ करण्यात आली.
याप्रकरणी दशरथ किसन जरडकर (वय ४४ वर्षे, रा. भूम, ता. भूम, जि. धाराशिव) याच्यावर गुन्हा दाखल करण्यात आला आहे. येरमाळा पोलिसांना मिळालेल्या गुप्त माहितीनुसार, त्यांनी गुरुवारी पहाटे येरमाळा पुलाजवळ सापळा रचला. यावेळी कळंब रोडवरून येणारा टाटा कंपनीचा ८०७ टेम्पो (क्र. एमएच ११ एजी ७५३८) पोलिसांनी थांबवला.
टेम्पोची तपासणी केली असता, त्यामध्ये अत्यंत निर्दयपणे कोंबलेल्या अवस्थेत ९ गोवंशीय (गावरान व जर्शी) गायी आढळून आल्या. या गायींना चारा-पाण्याची कोणतीही सोय न करता, दाटीवाटीने टेम्पोत भरून कत्तलीसाठी नेले जात असल्याचे प्रथमदर्शनी दिसून आले.
पोलिसांनी तात्काळ टेम्पो आणि त्यातील ९ गायी जप्त केल्या. जप्त केलेल्या गायी आणि वाहनाची एकूण किंमत ५ लाख ६ हजार रुपये आहे. याप्रकरणी पोलिसांनी सरकारतर्फे फिर्याद देऊन आरोपी दशरथ जरडकर याच्या विरोधात महाराष्ट्र प्राणी संरक्षण अधिनियम, प्राण्यांना क्रूरतेने वागवण्यास प्रतिबंध अधिनियम, महाराष्ट्र पोलीस कायदा, मोटार वाहन कायदा तसेच भारतीय न्याय संहितेच्या संबंधित कलमांन्वये गुन्हा नोंदवला आहे. पुढील तपास येरमाळा पोलीस करत आहेत.
