कळंब – येथील डोकी रोड परिसरात एका ३१ वर्षीय तरुणाला जातीयवादी शिवीगाळ करून दगडाने आणि लाथाबुक्यांनी मारहाण केल्याची धक्कादायक घटना घडली आहे. याप्रकरणी कळंब पोलीस ठाण्यात तिघांविरुद्ध भारतीय न्याय संहिता आणि अनुसूचित जाती-जमाती अत्याचार प्रतिबंधक कायद्यान्वये (ॲट्रॉसिटी) गुन्हा दाखल करण्यात आला आहे.
प्रेम दयानंदन हौसलमल (वय ३१, रा. भिमनगर, कळंब) असे फिर्यादीचे नाव आहे. त्यांनी दिलेल्या तक्रारीनुसार, १० ऑगस्ट २०२५ रोजी रात्री सव्वाआठ वाजण्याच्या सुमारास डोकी रोड येथे ही घटना घडली. आरोपी मयुर जयप्रकाश रुनवाल, जयप्रकाश रुनवाल आणि सागर तापडीया (सर्व रा. कळंब) यांनी संगनमत करून प्रेम हौसलमल यांना जातीयवादी शिवीगाळ केली. त्यानंतर त्यांना लाथाबुक्यांनी आणि दगडाने मारहाण करून जखमी केले, असे फिर्यादीत म्हटले आहे.
या घटनेनंतर प्रेम हौसलमल यांनी १ सप्टेंबर २०२५ रोजी कळंब पोलीस ठाण्यात तक्रार दाखल केली. त्यांच्या तक्रारीवरून पोलिसांनी आरोपींविरुद्ध भारतीय न्याय संहिता कलम ११८(१), ३५२, ३५१(२), ११५(२) ३(५) तसेच अनुसूचित जाती-जमाती अत्याचार प्रतिबंधक कायद्याच्या कलम ३(१)(आर)(एस) आणि ३(२)(व्हीए) अन्वये गुन्हा नोंदवला आहे. या प्रकरणाचा पुढील तपास पोलीस करत आहेत.
