कळंब – तालुक्यातील मस्सा (खं.) येथे जुन्या भांडणाच्या कारणावरून एका ५० वर्षीय व्यक्तीला शिवीगाळ करत खोऱ्याने आणि लाथाबुक्यांनी मारहाण करून जखमी केल्याची घटना घडली आहे. सुमारे महिनाभरापूर्वी घडलेल्या या घटनेप्रकरणी कळंब पोलीस ठाण्यात एका व्यक्तीविरोधात गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, फिर्यादी गौतम रामभाऊ घोडके (वय ५०, रा. मस्सा खं.) यांनी याप्रकरणी तक्रार दिली आहे. १३ मे २०२५ रोजी रात्री साडेआठ वाजण्याच्या सुमारास मस्सा (खं.) गावात ही घटना घडली. आरोपी पोपट गोरख ताटे (रा. मस्सा खं.) याने जुन्या भांडणाच्या कारणावरून फिर्यादी गौतम घोडके यांना शिवीगाळ करण्यास सुरुवात केली. त्यानंतर त्याने लाथाबुक्यांनी आणि खोऱ्याने मारहाण करून त्यांना जखमी केले, असे फिर्यादीत नमूद करण्यात आले आहे.
या घटनेनंतर १५ जून रोजी गौतम घोडके यांनी कळंब पोलीस ठाण्यात फिर्याद दिली. त्यांच्या तक्रारीवरून पोलिसांनी आरोपी पोपट ताटे याच्याविरुद्ध भारतीय न्याय संहितेच्या कलम ११८(१) आणि ३५२ अन्वये गुन्हा नोंदवला आहे. घटनेचा पुढील तपास कळंब पोलीस करत आहेत.
