कळंब (जि. धाराशिव): येथील कळंब-परळी रोडवरील एका पेट्रोल पंपाच्या व्यवसायात भागीदारीचा विश्वास संपादन करून, एका महिलेची तब्बल ४ कोटी ४८ लाख ९४ हजार १४५ रुपयांची आर्थिक फसवणूक झाल्याचा धक्कादायक प्रकार उघडकीस आला आहे. या प्रकरणी कळंब पोलीस ठाण्यात एका व्यक्तीविरुद्ध फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, सरस्वती आप्पासाहेब बोंदर (वय ५१ वर्षे, रा. शिक्षक कॉलनी, डिकसळ, ता. कळंब) यांनी या प्रकरणी फिर्याद दिली आहे. तर विकास वल्लभदास कोंडेकर (रा. शिराढोण, ता. कळंब) असे गुन्हा दाखल झालेल्या आरोपीचे नाव आहे.
नेमका प्रकार काय?
आरोपी विकास कोंडेकर याने फिर्यादी सरस्वती बोंदर यांना विश्वासात घेऊन कळंब-परळी रोडवर ‘मे. सिद्धांत पेट्रोलियम लि.’ हा पेट्रोल पंप भागीदारीत सुरू केला होता. सन २०१७ पासून ते जुलै २०२५ या कालावधीत आरोपीने या व्यवसायात मोठी अफरातफर केली.
पेट्रोल पंपावरील एकूण खरेदी-विक्री, बँकेत भरलेले पैसे आणि व्यवसायातील खेळते भांडवल (कॅश इन हँड) या सर्वांच्या रेकॉर्डमध्ये आरोपीने जाणीवपूर्वक फेरफार केला. तसेच खतावण्या, रोजमेळ यांसारख्या नोंदवह्यांमध्ये खोटा मजकूर नोंदवून, तसे सी.ए. (CA) कडून ऑडिट करून घेतले. या माध्यमातून आरोपीने तब्बल आठ वर्षांच्या काळात फिर्यादीची वेळोवेळी एकूण ४,४८,९४,१४५ रुपयांची फसवणूक केली.
पोलिसांत गुन्हा दाखल
आपल्या सोबत कोट्यवधी रुपयांचा विश्वासघात झाल्याचे लक्षात आल्यानंतर, सरस्वती बोंदर यांनी सोमवारी (दि. २ मार्च २०२६) कळंब पोलीस ठाण्यात धाव घेऊन प्रथम खबर दिली. त्यांच्या फिर्यादीवरून पोलिसांनी आरोपी विकास कोंडेकर याच्याविरुद्ध भारतीय न्याय संहितेच्या (BNS) कलम ३१६ (२) आणि ३१८ (३) अन्वये गुन्हा नोंदवला आहे. या मोठ्या आर्थिक फसवणुकीच्या प्रकरणाचा पुढील तपास कळंब पोलीस करत आहेत.
