लोहारा: लोहारा तालुक्यातील कास्ती बुद्रुक येथे मोठ्याने बोलण्याच्या किरकोळ कारणावरून एका ३६ वर्षीय व्यक्तीला तिघांनी मिळून बेदम मारहाण केली. आरोपींनी लोखंडी साकळी आणि हातातील कढ्याने मारहाण करून त्यांना जखमी केले. इतकेच नव्हे, तर त्यांची मोटरसायकलही रोडवर आपटून नुकसान केले. या प्रकरणी तिन्ही आरोपींविरुद्ध लोहारा पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, नितीन माणिक लोभे (वय ३६ वर्षे, रा. नागुर, ता. लोहारा, जि. धाराशिव) हे फिर्यादी आहेत. आरोपी जिवन सुभाष राठोड, आकाश बाबुराव राठोड आणि विशाल तात्याराव राठोड (तिघे रा. कास्ती बुद्रुक, ता. लोहारा) यांनी दिनांक २१.०४.२०२५ रोजी दुपारी सव्वादोनच्या सुमारास कास्ती बुद्रुक येथील चौकातील भंडारे यांच्या दुकानाजवळ नितीन लोभे यांना अडवले.
नितीन लोभे मोठ्याने बोलत असल्याच्या कारणावरून आरोपींनी त्यांना शिवीगाळ करण्यास सुरुवात केली. त्यानंतर त्यांना लाथाबुक्यांनी तसेच हातातील लोखंडी साकळी आणि कढ्याने बेदम मारहाण करून जखमी केले. यावेळी आरोपींनी नितीन लोभे यांची हिरो होंडा मोटरसायकलही रोडवर आपटून तिचे नुकसान केले. तसेच, त्यांना जिवे ठार मारण्याची धमकीही दिली.
या घटनेनंतर जखमी नितीन लोभे यांनी लोहारा पोलीस ठाण्यात धाव घेऊन फिर्याद दिली. त्यांच्या प्रथम खबरेवरून (फिर्यादीवरून) दिनांक २१.०४.२०२५ रोजी लोहारा पोलीस ठाण्यात आरोपी जिवन राठोड, आकाश राठोड आणि विशाल राठोड यांच्याविरुद्ध भारतीय न्याय संहिता कलम ११८(१), ११५(२), ३२४(४), ३५२, ३५१(२)(३) सह ३(५) अन्वये गंभीर दुखापत करणे, मालमत्तेचे नुकसान करणे आणि जिवे मारण्याची धमकी देणे या कलमांखाली गुन्हा दाखल करण्यात आला आहे. घटनेचा पुढील तपास लोहारा पोलीस करत आहेत.
