मुरूम: शासनाने प्रतिबंधित केलेला गुटखा आणि तंबाखूजन्य पदार्थांची अवैध विक्री करण्यासाठी साठा बाळगल्याप्रकरणी मुरूम पोलिसांनी एका ५५ वर्षीय इसमावर कारवाई केली आहे. या कारवाईत पोलिसांनी गुटखा आणि दुचाकी असा एकूण ५० हजार रुपयांचा मुद्देमाल जप्त केला आहे.
पोलिसांनी दिलेल्या माहितीनुसार, ३१ डिसेंबर २०२५ रोजी सायंकाळी ५ वाजेच्या सुमारास मुरूम शहरातील अक्कलकोट रोडवरील श्रीराम मंगल कार्यालयासमोर ही कारवाई करण्यात आली. आरोपी मुन्ना ईस्माईल नुरसे (वय ५५, रा. आनंदनगर, ता. उमरगा, जि. धाराशिव) हा आपल्या दुचाकीवरून प्रतिबंधित गुटखा विक्रीच्या उद्देशाने घेऊन जात असल्याची माहिती पोलिसांना मिळाली होती.
त्यानुसार मुरूम पोलीस ठाण्याच्या पथकाने सापळा रचून त्याला ताब्यात घेतले. त्याची झडती घेतली असता त्याच्याकडे महाराष्ट्रात प्रतिबंधित असलेला केशरयुक्त विमल पान मसाला आणि व्ही-१ तंबाखू आढळून आला. पोलिसांनी हा गुटखा आणि गुन्ह्यात वापरलेली दुचाकी असा एकूण ५० हजार रुपये किमतीचा मुद्देमाल जप्त केला आहे.
याप्रकरणी पोलीस पथकाने दिलेल्या फिर्यादीवरून मुरूम पोलीस ठाण्यात आरोपी मुन्ना नुरसे याच्याविरुद्ध भारतीय न्याय संहिता (BNS) कलम १२३, २२३, २७४ आणि २७५ अन्वये गुन्हा दाखल करण्यात आला आहे. पुढील तपास मुरूम पोलीस करत आहेत.
