नळदुर्ग – नळदुर्ग ( मैलारपूर ) येथील श्री खंडोबा देवाच्या यात्रेनिमित्त होणारी भाविकांची प्रचंड गर्दी लक्षात घेता, राष्ट्रीय महामार्ग क्रमांक ६५ वरून (नळदुर्ग बायपास) जाणाऱ्या अवजड वाहतुकीच्या मार्गात बदल करण्यात आला आहे. याबाबतचे आदेश धाराशिवच्या पोलीस अधीक्षक रितु खोखर यांनी जारी केले आहेत. हा बदल दिनांक ०२/०१/२०२६ रोजी सकाळी ०७:०० वाजेपासून ते दिनांक ०४/०१/२०२६ रोजी रात्री २३:५५ वाजेपर्यंत लागू राहणार आहे.
लाखो भाविकांच्या सुरक्षिततेसाठी निर्णय
नळदुर्ग जवळील मैलारपूर येथे श्री खंडोबा देवाची यात्रा २ ते ४ जानेवारी २०२६ या कालावधीत साजरी होत आहे. या यात्रेसाठी सोलापूर, धाराशिव आणि राज्याच्या इतर भागांतून साधारण ४ ते ५ लाख भाविक खाजगी वाहनांसह उपस्थित राहण्याची शक्यता आहे. खंडोबा मंदिर हे राष्ट्रीय महामार्ग क्र. ६५ (नळदुर्ग बायपास) लगत असल्याने, या मार्गावर अवजड वाहनांमुळे वाहतूक कोंडी होऊन अपघात घडण्याची शक्यता नाकारता येत नाही. कायदा व सुव्यवस्था अबाधित राखण्यासाठी आणि भाविकांच्या सुरक्षिततेसाठी हा निर्णय घेण्यात आला आहे.
अशी असेल पर्यायी वाहतूक व्यवस्था (डायव्हर्जन):
पोलीस अधीक्षकांनी महाराष्ट्र पोलीस अधिनियम १९५१ चे कलम ३३ (१) (ब) अन्वये अधिकाराचा वापर करून सोलापूर-हैद्राबाद मार्गावरील जड वाहनांसाठी खालीलप्रमाणे मार्ग निश्चित केला आहे:
- सोलापूर/तुळजापूर कडून हैद्राबादकडे जाणारी जड वाहने:ही वाहने नळदुर्ग बायपासने न जाता, नळदुर्ग येथील उड्डाणपुलाच्या सर्व्हिस रोडने (Service Road) नळदुर्ग शहरातून, मुर्टा पाटीवरून पुढे हैद्राबादकडे मार्गक्रमण करतील.
- हैद्राबादकडून सोलापूर/तुळजापूरकडे येणारी जड वाहने:ही वाहने मुर्टा पाटीवरून नळदुर्ग शहरात प्रवेश करतील आणि नळदुर्ग येथील उड्डाणपुलाच्या सर्व्हिस रोडने पुढे सोलापूर-तुळजापूरकडे जातील.
कोणाला सूट?
सदर वाहतूक निर्बंधातून पोलीस दलाची वाहने, रुग्णवाहिका, अग्निशमन दल आणि इतर अत्यावश्यक सेवेतील शासकीय वाहनांना वगळण्यात आले आहे. भाविकांनी आणि वाहनचालकांनी या बदलाची नोंद घेऊन पोलीस प्रशासनास सहकार्य करण्याचे आवाहन करण्यात आले आहे.
