नळदुर्ग (ता. तुळजापूर) : येथील बस स्थानकासमोरील शिवराज हॉटेलसमोर मंगळवारी रात्री घडलेल्या पप्पू सुरवसे या तरुणाच्या निर्घृण खुनाने संपूर्ण नळदुर्ग शहर हादरले आहे. दोन ते तीन अज्ञात हल्लेखोरांनी कोयत्याने सपासप वार करून पप्पू याचा जागीच खून केला. या घटनेनंतर परिसरात तणावाचे वातावरण असून, आरोपींना तात्काळ अटक करण्याच्या मागणीसाठी मयताच्या नातेवाईकांनी नळदुर्ग उपजिल्हा रुग्णालयासमोर ठिय्या आंदोलन सुरू केले आहे.
मिळालेल्या माहितीनुसार, हल्ला इतका भीषण होता की पप्पू सुरवसे रक्ताच्या थारोळ्यात घटनास्थळीच गतप्राण झाला. घटनेची माहिती मिळताच नळदुर्ग पोलिसांनी तात्काळ घटनास्थळी धाव घेऊन पंचनामा केला होता. याप्रकरणी नळदुर्ग पोलीस स्टेशनमध्ये खुनाचा गुन्हा दाखल करण्यात आला असून, पोलीस हल्लेखोरांचा शोध घेत आहेत.
प्राथमिक तपासात ही हत्या पूर्ववैमनस्यातून झाली असावी, असा अंदाज पोलिसांनी व्यक्त केला आहे. परिसरातील सीसीटीव्ही फुटेज तपासण्याचे काम युद्धपातळीवर सुरू आहे. धक्कादायक बाब म्हणजे, हल्लेखोर हा मयत पप्पू सुरवसे याच्या ओळखीचा असल्याचे समजते. दोघांमध्ये सुरू असलेल्या भांडणादरम्यान, समोरच्या व्यक्तीच्या मुलाने कोयता आणून पप्पू सुरवसे याच्यावर सपासप वार करून त्याला ठार केल्याची प्राथमिक माहिती समोर येत आहे.
आरोपींच्या अटकेसाठी नातेवाईक आक्रमक
दरम्यान, जोपर्यंत आरोपींना अटक होत नाही, तोपर्यंत मयत पप्पू सुरवसे याचे पोस्टमार्टम करू देणार नाही, अशी भूमिका त्याच्या संतप्त नातेवाईकांनी घेतली आहे. आरोपींना तात्काळ अटक करण्याच्या मागणीसाठी नातेवाईकांनी नळदुर्ग उपजिल्हा रुग्णालयासमोर ठिय्या आंदोलन सुरू केले आहे. यामुळे पोलिसांवरील दबाव वाढला असून, आरोपींचा शोध घेण्यासाठी पोलिसांची पथके विविध ठिकाणी रवाना करण्यात आली आहेत. या घटनेमुळे नळदुर्ग परिसरात भीतीचे सावट पसरले असून, पोलीस पुढील तपास करत आहेत.
