परंडा: शहरातील कसाब गल्ली परिसरात निवडणुकीच्या जुन्या कारणावरून दोन गटांत वाद होऊन त्याचे पर्यवसान हाणामारीत झाल्याची घटना घडली आहे. १४ जानेवारीच्या रात्री चौघांनी मिळून काका-पुतण्याला लोखंडी रॉड आणि दगडाने बेदम मारहाण करून गंभीर जखमी केले. याप्रकरणी परंडा पोलीस ठाण्यात चौघांविरुद्ध गुन्हा दाखल करण्यात आला आहे.
याबाबत सविस्तर वृत्त असे की, परंडा शहरातील कसाब गल्ली, दर्गा रोड भागात १४ जानेवारी २०२६ रोजी रात्री ८ वाजेच्या सुमारास ही घटना घडली. इस्माईल अब्दुल सत्तार कुरेशी (वय १९) आणि त्यांचा पुतण्या बिलाल कुरेशी हे दोघे कसाब गल्ली रोडवर असताना, आरोपींनी त्यांना अडवले. निवडणुकीच्या कारणावरून आरोपींनी त्यांना शिवीगाळ करण्यास सुरुवात केली.
वाद विकोपाला गेल्यानंतर आरोपींनी इस्माईल आणि बिलाल यांना लाथाबुक्क्यांनी मारहाण केली. एवढ्यावरच न थांबता, त्यांनी लोखंडी रॉड आणि दगडाने हल्ला चढवत दोघांना गंभीर जखमी केले. तसेच, जाताना त्यांना जीवे ठार मारण्याची धमकी दिली.
याप्रकरणी जखमी इस्माईल कुरेशी यांनी १५ जानेवारी रोजी दिलेल्या फिर्यादीवरून खालील चार आरोपींविरुद्ध परंडा पोलिसांत गुन्हा दाखल करण्यात आला आहे:
१. सरफराज उर्फ बबू महम्मद कुरेशी २. गौस अलीशेर कुरेशी ३. महमंदशरीफ मयनोद्दीन कुरेशी ४. अफजल मंजूर कुरेशी (सर्व रा. कसाब गल्ली, दर्गा रोड, परंडा)
या चौघांविरुद्ध भारतीय न्याय संहिता (BNS) कलम ११८(२), ११८(१) (दुखापत करणे), ३५२ (शांतता भंग), ३५१(२) (धमकी) आणि ३(५) अन्वये गुन्हा नोंदवण्यात आला असून, पोलीस अधिक तपास करत आहेत.
