परंडा – “आम्हाला वाळू का काढू देत नाहीस?” असा जाब विचारत, वाळू काढण्यास विरोध करणाऱ्या ३५ वर्षीय सरपंचाला तिघा जणांनी मिळून शिवीगाळ करत लाथाबुक्क्यांनी, हायड्रोलिक पाईप आणि हॉकी स्टीकने मारहाण करून जखमी केले. ही घटना परंडा तालुक्यातील चिंचपूर-लंगोटवाडी रस्त्यावर घडली. याप्रकरणी पीडित तरुणाने दिलेल्या फिर्यादीवरून आंबी पोलीस ठाण्यात तिघांविरुद्ध गुन्हा दाखल करण्यात आला आहे.
याबाबत अधिक माहिती अशी की, फिर्यादी सरपंच महेश भागवत देवकर (वय ३५ वर्षे, रा. चिंचपूर बु., ता. परंडा) यांनी आंबी पोलीस ठाण्यात तक्रार दिली आहे. त्यानुसार, दि. ५ एप्रिल २०२५ रोजी रात्री ८ वाजण्याच्या सुमारास ते चिंचपूर ते लंगोटवाडी रस्त्यावर असताना आरोपी माधव कल्याण शिंदे, बालाजी प्रदीप शिंदे आणि अशोक अंगद अनभुले (सर्व रा. चिंचपूर बु., ता. परंडा) यांनी त्यांना अडवले.
‘तू आम्हाला वाळू का काढू देत नाही?’ असे म्हणत आरोपींनी महेश देवकर यांना शिवीगाळ करण्यास सुरुवात केली. त्यानंतर त्यांना लाथाबुक्क्यांनी, हायड्रोलिक पाईप आणि हॉकी स्टीकने मारहाण करून जखमी केले. तसेच, आरोपींनी त्यांना जीवे ठार मारण्याची धमकीही दिली.
या घटनेनंतर सरपंच महेश देवकर यांनी दि. ९ एप्रिल २०२५ रोजी आंबी पोलीस ठाण्यात फिर्याद दाखल केली. त्यांच्या तक्रारीवरून पोलिसांनी आरोपी माधव शिंदे, बालाजी शिंदे आणि अशोक अनभुले यांच्याविरुद्ध भारतीय न्याय संहिता कलम ११८(१), ११५(२), २८१, ३५२, ३५१(२), ३(५) अन्वये गुन्हा नोंदवला आहे.
वाळू उपशाच्या वादातून झालेल्या या हल्ल्यामुळे परिसरात खळबळ उडाली असून, आंबी पोलीस याप्रकरणी अधिक तपास करत आहेत.
