परंडा: आईचा सांभाळ करण्याच्या कारणावरून एकाला पाच जणांनी मिळून लाथाबुक्क्यांनी व काठीने बेदम मारहाण केल्याची घटना परंडा शहरातील मुजावर गल्ली भागात घडली. याप्रकरणी परंडा पोलीस ठाण्यात पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, सादिक गणी शेख (वय ४२, रा. मुजावर गल्ली, दर्गा रोड, परंडा) हे या घटनेत जखमी झाले आहेत. त्यांनी दिलेल्या फिर्यादीनुसार, दिनांक २१ जानेवारी २०२६ रोजी सायंकाळी ५:३० वाजण्याच्या सुमारास मुजावर गल्ली, दर्गा रोड येथे आरोपींनी आईला सांभाळण्याच्या कारणावरून सादिक शेख यांच्याशी वाद घातला.
यावेळी आरोपी जमील अली शेख, शाईन जमील शेख, रमीज जमील शेख, हाजी जमील शेख आणि समीरा अन्वर मुलानी (सर्व रा. मुजावर गल्ली, परंडा) यांनी गैरकायद्याची मंडळी जमवून सादिक शेख यांना शिवीगाळ केली. तसेच लाथाबुक्क्यांनी व काठीने मारहाण करून जखमी केले आणि जिवे मारण्याची धमकी दिली.
याप्रकरणी सादिक शेख यांनी २२ जानेवारी रोजी दिलेल्या फिर्यादीवरून परंडा पोलीस ठाण्यात भारतीय न्याय संहिता (BNS) कलम ११८(१), ११५(२), ३५२, ३५१(२), १८९(२), १९१(२), १९१(३) आणि १९० अन्वये गुन्हा दाखल करण्यात आला आहे. पुढील तपास पोलीस करत आहेत.
