तुळजापूर : प्रेम आणि लग्नासाठी धमकावून सोशल मीडियावर बदनामी करण्याची आणि पिस्तुलाने जीवे मारण्याची धमकी दिल्याने एका पोलीस कर्मचाऱ्याच्या १५ वर्षीय मुलीने गळफास घेऊन आत्महत्या केल्याची धक्कादायक घटना तुळजापुरात घडली आहे. सारिका बिजली शिकारे (वय १५ वर्षे ५ महिने) असे मृत मुलीचे नाव असून, याप्रकरणी ओंकार कांबळे आणि नगीना शशिकांत पांडागळे या दोघांविरोधात आत्महत्येस प्रवृत्त केल्याचा गुन्हा दाखल करण्यात आला आहे. मुख्य आरोपी ओंकार कांबळे हा सराईत गुन्हेगार असून त्याच्यावर पिस्तूल खरेदी-विक्री आणि हत्येचा प्रयत्न केल्याचा गुन्हा दाखल आहे.
“मी तुळजापूरचा डॉन,” आरोपीची मुजोरी
मिळालेल्या माहितीनुसार, आरोपी ओंकार कांबळे ( वय २२ ) आणि नगीना पांडागळे हे सारिकाला वेळोवेळी बोलावून तिच्यावर ओंकारसोबत प्रेम आणि लग्न करण्यासाठी दबाव टाकत होते. नकार दिल्यास सोशल मीडियावर बदनामी करण्याची आणि पिस्तुलाने जीवे मारण्याची धमकी देत होते. या सततच्या त्रासाला आणि जाचाला कंटाळून सारिकाने ३१ मे २०२५ रोजी राहत्या घरी गळफास घेऊन आपले जीवन संपवले.
घटनेच्या आदल्या दिवशी आरोपी ओंकारने सारिकाची छेड काढली होती. त्यावेळी सारिकाच्या आईने, ज्या स्वतः एक पोलीस कर्मचारी आहेत, त्याला फोनवरून जाब विचारला असता, “मी तुळजापूरचा डॉन आहे, माझं कुणी वाकडं करू शकत नाही,” अशी मुजोर भाषा वापरून धमकी दिली होती. यावरून आरोपीची गुन्हेगारी मानसिकता आणि मस्तीखोरी दिसून येते.
अखेर गुन्हा दाखल
मुलीच्या आत्महत्येनंतर खचलेल्या आई, बिजली मधुकर शिकारे (वय ३५) यांनी १० जून २०२५ रोजी तुळजापूर पोलीस ठाण्यात फिर्याद दिली. त्यांच्या फिर्यादीवरून आरोपी ओंकार कांबळे आणि नगीना पांडागळे यांच्या विरोधात भारतीय न्याय संहिता कलम १०७ (आत्महत्येस प्रवृत्त करणे), ३५१(३) (धमकी देणे) आणि ३(५) अन्वये गुन्हा नोंदवण्यात आला आहे.
एका पोलीस कर्मचाऱ्याच्या मुलीला अशा प्रकारे धमकावून आत्महत्या करण्यास भाग पाडल्याने तुळजापुरात संतापाची लाट उसळली असून, आरोपींवर कडक कारवाई करण्याची मागणी जोर धरत आहे. आरोपी ओंकार कांबळे याचा गुन्हेगारी रेकॉर्ड पाहता, या प्रकरणाचा सखोल तपास करून त्याला कठोरात कठोर शिक्षा व्हावी, अशी मागणी नागरिकांमधून होत आहे.
