धाराशिव: राष्ट्रीय महामार्ग क्रमांक ५२ वर कर्तव्यावर असलेल्या पोलीस व्हॅनला एका भरधाव ट्रकने मागून जोरदार धडक दिल्याने झालेल्या भीषण अपघातात एका पोलीस हवालदाराचा दुर्दैवी मृत्यू झाला आहे, तर दोन पोलीस कर्मचाऱ्यांसह अन्य सहा जण जखमी झाले आहेत. ही घटना धाराशिव जिल्ह्यातील येरमाळा पोलीस ठाण्याच्या हद्दीत चोराखळी शिवारात गुरुवारी, दि. ७ ऑगस्ट २०२५ रोजी पहाटे अडीच वाजण्याच्या सुमारास घडली. अपघातानंतर ट्रक चालक घटनास्थळावरून फरार झाला आहे.
श्रीराम इराप्पा कांबळे (वय ५७ वर्षे), नेमणूक पोलीस मुख्यालय, धाराशिव असे अपघातात मरण पावलेल्या पोलीस हवालदाराचे नाव आहे.
याप्रकरणी पोलीस हवालदार विशाल रमेश गायकवाड (वय ४० वर्षे) यांनी दिलेल्या फिर्यादीनुसार, ते, चालक ग्रेड पोलीस उपनिरीक्षक दिनकर जाधवर आणि हवालदार श्रीराम कांबळे हे सरकारी वाहनाने (फोर्स लाईट व्हॅन, क्र. एमएच २५ एएल ०८५६) चोराखळी परिसरात पेट्रोलिंग करत होते. पहाटे अडीचच्या सुमारास त्यांनी चोराखळी पाटीजवळ रस्त्याच्या कडेला वाहन उभे करून एका इरटिगा कारची (क्र. एमएच १४ केजे ३४७८) तपासणी सुरू केली होती.
त्याचवेळी पाठीमागून आलेल्या एका ट्रकने (क्र. एचआर ३८ एई ७२३९) चालकाने अत्यंत हयगयीने आणि निष्काळजीपणे ट्रक चालवत रस्त्याच्या खाली उभ्या असलेल्या पोलीस व्हॅनला जोरदार धडक दिली. या धडकेत पोलीस व्हॅनचे मोठे नुकसान झाले आणि वाहनातील तिन्ही पोलीस कर्मचारी गंभीर जखमी झाले.
अपघातानंतर सर्वांना तातडीने धाराशिव येथील शासकीय रुग्णालयात उपचारासाठी दाखल करण्यात आले. मात्र, उपचारादरम्यान हवालदार श्रीराम कांबळे यांची प्राणज्योत मालवली. या अपघातात फिर्यादी विशाल गायकवाड, चालक दिनकर जाधवर यांच्यासह इरटिगा कारमधील प्रवासी आकाश भिक्कन मगरे, लखन मधुकर सुर्यवंशी, संतोष पुंडलिक सुर्यवंशी, कृष्णा ईश्वर सुर्यवंशी आणि अमोल शत्रुघ्न सुर्यवंशी हे देखील जखमी झाले आहेत.
अपघातास कारणीभूत ठरलेला ट्रक चालक जखमींना मदत न करता किंवा पोलिसांना माहिती न देता आपला ट्रक घेऊन घटनास्थळावरून पसार झाला. याप्रकरणी विशाल गायकवाड यांनी दिलेल्या फिर्यादीवरून, येरमाळा पोलीस ठाण्यात ट्रक चालकाविरुद्ध भारतीय न्याय संहिता कलम २८१, १०६(१), १२५(ए), १२५(ब) तसेच मोटार वाहन कायद्याच्या विविध कलमांन्वये गुन्हा नोंदवण्यात आला आहे. पोलीस फरार ट्रक चालकाचा शोध घेत आहेत. या घटनेमुळे पोलीस दलात हळहळ व्यक्त होत आहे.
