तामलवाडी – तुळजापूर तालुक्यातील तामलवाडी येथील कटारे मिल परिसरातील महालक्ष्मी मंदिराचे कुलूप तोडून अज्ञात चोरट्याने देवीच्या अंगावरील सुमारे १ लाख ४० हजार रुपये किमतीचे सोन्याचे दागिने आणि एक रिकामी लाकडी पेटी चोरून नेल्याची घटना उघडकीस आली आहे. ही घटना रविवारी, १३ एप्रिल २०२५ रोजी मध्यरात्री सव्वादोन वाजण्याच्या सुमारास घडली.
याप्रकरणी मंदिराचे पुजारी देवीदास गुरुनाथ गौडा (वय ४०, रा. कटारे मिल, तामलवाडी) यांनी १३ एप्रिल रोजी तामलवाडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, तामलवाडीतील कटारे मिल येथे महालक्ष्मी मंदिर आहे. १३ एप्रिल रोजी रात्री सुमारे ०२:१९ वाजता अज्ञात व्यक्तीने मंदिराच्या दरवाजाचे कुलूप तोडून आत प्रवेश केला. चोरट्याने मंदिरातील महालक्ष्मी देवीच्या मूर्तीवरील ३६.५ ग्रॅम वजनाचे सोन्याचे दागिने आणि एक रिकामी लाकडी पेटी, असा एकूण अंदाजे १,४०,००० रुपये किमतीचा मुद्देमाल चोरून नेला.
मंदिराचे पुजारी देवीदास गौडा यांच्या लक्षात हा प्रकार आल्यानंतर त्यांनी तात्काळ तामलवाडी पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी अज्ञात चोरट्याविरुद्ध भारतीय न्याय संहिता कलम ३३१(४) आणि ३०५(ए) अन्वये गुन्हा नोंदवला आहे. तामलवाडी पोलीस चोरट्याचा शोध घेत आहेत.
दाळींब येथे घरासमोर झोपलेल्या दाम्पत्याकडील ऐवज लंपास
उमरगा तालुक्यातील दाळींब येथे घरासमोर झोपलेल्या एका दाम्पत्याच्या उशाखालून अज्ञात चोरट्याने सोन्याचे दागिने आणि मोबाईल फोन असा सुमारे ६६ हजार रुपयांचा मुद्देमाल चोरून नेल्याची घटना घडली आहे. ही चोरी ६ एप्रिल २०२५ च्या मध्यरात्री ते ७ एप्रिल २०२५ च्या पहाटेदरम्यान घडली. याप्रकरणी १३ एप्रिल २०२५ रोजी मुरुम पोलीस ठाण्यात गुन्हा दाखल करण्यात आला आहे.
याबाबत पोलिसांनी दिलेली माहिती अशी की, फिर्यादी शिवानंद गुरुलींग वाले (वय ६७, रा. दाळींब, ता. उमरगा) हे आपल्या पत्नीसह ६ एप्रिल रोजी रात्री साडेअकरा ते ७ एप्रिल रोजी पहाटे अडीच वाजण्याच्या सुमारास राहत्या घरासमोर झोपले होते. त्यांनी सोन्याचे दागिने व मोबाईल फोन उशाखाली ठेवले होते.
यादरम्यान, अज्ञात चोरट्याने फिर्यादी शिवानंद वाले यांच्या पत्नीच्या उशाखाली ठेवलेले ९ ग्रॅम वजनाचे सोन्याचे दागिने आणि एक मोबाईल फोन, असा एकूण अंदाजे ६६,००० रुपये किमतीचा मुद्देमाल चोरून नेला. झोपेतून जागे झाल्यावर त्यांना चोरी झाल्याचे लक्षात आले.
शिवानंद वाले यांनी या घटनेची तक्रार १३ एप्रिल रोजी मुरुम पोलीस ठाण्यात दिली. त्यांच्या फिर्यादीवरून पोलिसांनी अज्ञात आरोपीविरुद्ध भारतीय न्याय संहिता कलम ३०३(२) अन्वये गुन्हा नोंदवला आहे. पोलीस पुढील तपास करत आहेत.
