तुळजापूर: तुळजाभवानी मंदिरात दर्शनासाठी आलेल्या महिलेचे २० ग्रॅम वजनाचे सोन्याचे मंगळसूत्र चोरीला गेल्याची घटना घडली आहे. याप्रकरणी तुळजापूर पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
निकिता अक्षय कुंदारम (वय २६, रा. हुचन नगर, सोलापूर) यांनी दिलेल्या फिर्यादीत म्हटले आहे की, त्या १० नोव्हेंबर रोजी पतीसह तुळजाभवानी मंदिरात दर्शनासाठी आल्या होत्या. त्यावेळी गर्दीचा फायदा घेत अज्ञात चोरट्याने त्यांच्या गळ्यातील २० ग्रॅम वजनाचे, अंदाजे ९० हजार रुपये किमतीचे मंगळसूत्र चोरून नेले.
या घटनेची माहिती मिळताच तुळजापूर पोलिसांनी घटनास्थळी धाव घेत पंचनामा केला. तसेच परिसरातील सीसीटीव्ही फुटेज तपासण्यास सुरुवात केली आहे. अज्ञात चोरट्याचा शोध घेतला जात आहे.
पोलीसांनी दिलेल्या माहितीनुसार, मंदिरात अशा प्रकारच्या चोऱ्यांचे प्रमाण वाढत आहे. त्यामुळे भाविकांनी आपल्या मौल्यवान वस्तूंची काळजी घेण्याचे आवाहन पोलिसांनी केले आहे.
