तुळजापूर : दुसऱ्या बँक खातेदाराच्या नावाने चक्क बनावट आधार कार्ड तयार करून, डुप्लिकेट पासबुकच्या आधारे बँक खाते रिकामे करण्याचा धक्कादायक प्रकार तुळजापूर येथे उघडकीस आला आहे. शहरातील नळदुर्ग रोडवरील स्टेट बँक ऑफ इंडियाच्या (एसबीआय) शाखेत हा प्रकार घडला असून, सतर्कतेमुळे हा डाव फसला आहे. याप्रकरणी बँकेची फसवणूक केल्याच्या आरोपाखाली सोलापूर जिल्ह्यातील दोघांवर तुळजापूर पोलिस ठाण्यात गुन्हा दाखल करण्यात आला आहे.
हणमंत दगडू घोडगे (वय ७०) आणि मनीषा संदीप गायकवाड (वय २५, दोघेही रा. कामटी, ता. ग्रामीण सोलापूर, जि. सोलापूर) अशी गुन्हा दाखल झालेल्या संशयित आरोपींची नावे आहेत.
पोलिसांनी दिलेल्या माहितीनुसार, शिवाजी बाबुराव उळेकर (रा. तुळजापूर) यांचे नळदुर्ग रोडवरील एसबीआय बँकेत खाते (खाते क्र. ६२०४११३४६८३) आहे. आरोपी हणमंत घोडगे आणि मनीषा गायकवाड यांनी संगनमत करून शिवाजी उळेकर यांच्या नावाचे बनावट आधार कार्ड तयार केले. सोमवारी (ता. ३०) दुपारी सव्वाबारा वाजेच्या सुमारास हे दोघेही एसबीआय बँकेच्या शाखेत आले. त्यांनी या बनावट आधार कार्डच्या आधारे बँकेत केवायसी (KYC) प्रक्रिया पूर्ण करून डुप्लिकेट पासबुक मिळवण्याचा प्रयत्न केला. पासबुक हाती आल्यानंतर उळेकर यांच्या खात्यातील पैसे काढून बँकेची आणि खातेदाराची फसवणूक करण्याचा त्यांचा मुख्य उद्देश होता.
मात्र, बँकेतील कर्मचाऱ्यांच्या निदर्शनास हा संशयास्पद प्रकार आल्यानंतर आरोपींचा हा डाव उधळला गेला. याप्रकरणी बँकेचे कर्मचारी ओंकार धोंडीराम कांबळे (वय २७, मूळ रा. चंदूर, ता. हातकणंगले, जि. कोल्हापूर, सध्या रा. मेहता हॉस्पिटलजवळ, तुळजापूर) यांनी तत्काळ तुळजापूर पोलिस ठाण्यात धाव घेऊन फिर्याद दिली.
या प्रथम खबरीवरून तुळजापूर पोलिसांनी सोमवारी (ता. ३०) रात्री उशिरा आरोपी हणमंत घोडगे आणि मनीषा गायकवाड यांच्यावर भारतीय न्याय संहिता (भा.न्या.सं.) कलम ३१८(४), ६२, ३(५) अन्वये फसवणुकीचा गुन्हा दाखल केला आहे. या प्रकरणाचा पुढील तपास पोलिस करत असून, यामागे आणखी मोठी टोळी सक्रिय आहे का, याचाही शोध घेतला जात आहे.
