उमरगा: घराच्या सामाईक भिंतीला छिद्र पाडण्यावरून झालेल्या वादातून एका महिलेला, तिच्या मुलांना आणि अपंग पतीला शिवीगाळ करत काठी, दगडाने आणि लाथाबुक्यांनी मारहाण करण्यात आल्याची धक्कादायक घटना उमरगा तालुक्यातील कोळसुर गुंजोटी तांडा येथे घडली आहे. याप्रकरणी एकाच कुटुंबातील तीन जणांविरुद्ध उमरगा पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, सविता सुभाष जाधव (वय ३६, रा. कोळसुर गुंजोटी तांडा) यांनी यासंदर्भात फिर्याद दिली आहे. १२ ऑक्टोबर २०२५ रोजी रात्री आठ वाजण्याच्या सुमारास त्यांच्याच परिसरात राहणारे आरोपी बाबुराव हरीशचंद्र जाधव, अमीत बाबुराव जाधव आणि सुनिता बाबुराव जाधव यांनी सामाईक भिंतीला छिद्र पाडण्यास सुरुवात केली. याला सविता जाधव यांनी विरोध केला असता, आरोपींनी त्यांना व त्यांच्या मुलांना शिवीगाळ करत लाथाबुक्यांनी, काठीने आणि दगडाने मारहाण करून जखमी केले.
यावेळी फिर्यादी यांचे पती सुभाष जाधव हे अपंग असल्याचे माहीत असूनही, आरोपींनी त्यांनाही शिवीगाळ करत काठीने मारहाण केली व जखमी केले. तसेच, संपूर्ण कुटुंबाला जिवे ठार मारण्याची धमकी दिली.
या घटनेनंतर सविता जाधव यांनी १३ ऑक्टोबर रोजी उमरगा पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी बाबुराव जाधव, अमीत जाधव आणि सुनिता जाधव यांच्या विरोधात भारतीय न्याय संहिता कलम ११८ (१), ११५(२), ३५२, ३५१(२), ३५१ (३) सह अपंग व्यक्ती अधिकार अधिनियम २०१६ च्या कलम ९२ (ए) आणि ९२(बी) अन्वये गुन्हा नोंदवला आहे. पोलीस या प्रकरणाचा पुढील तपास करत आहेत.
