धाराशिव – कळंब तालुक्यातील येरमाळा येथील प्रसिद्ध येडेश्वरी मंदिर परिसरात आज (शनिवार) नारळी पौर्णिमेनिमित्त झालेल्या गर्दीत गावगुंडांनी मोठा गोंधळ घालून दहशत माजवली. या घटनेत मंदिरातील सुरक्षा रक्षकाला तसेच काही भाविकांना मारहाण करण्यात आली असून, शिवसेना (ठाकरे गट) शहर संघटक प्रशांत बापू साळुंखे यांचा ६ वर्षीय मुलगाही जखमी झाला आहे. धक्कादायक म्हणजे, ही हाणामारी पोलीसांच्या उपस्थितीत झाली असून पोलीसांनी बघ्याची भूमिका घेतल्याचा आरोप आहे.
मिळालेल्या माहितीनुसार, येडेश्वरी देवीच्या दर्शनासाठी जात असताना सुरक्षा रक्षकाने काही संशयितांना हटकल्यामुळे संतापलेल्या ४ ते ५ जणांनी रक्षकाला जबर मारहाण केली. त्यानंतर २० ते २५ जणांनी एकत्र येऊन मंदिर परिसरात दहशत निर्माण केली. या दरम्यान, इतर भाविकांना देखील धक्काबुक्की झाल्याची माहिती समोर आली आहे.
प्रशांत बापू साळुंखे यांनी सांगितले की, “आज आम्ही पूर्ण कुटुंब दर्शनासाठी गेलो होतो. गोंधळाच्या वेळी माझा मुलगा मार्तंड याच्या पायावर मार लागून तो जखमी झाला.”
नारळी पौर्णिमेनिमित्त आज येडेश्वरी डोंगरावर लाखोंच्या संख्येने भाविक दर्शनासाठी आले होते. मात्र, गावगुंडांच्या या गोंधळामुळे भाविकांमध्ये भीतीचे वातावरण निर्माण झाले. मारहाण झालेला सुरक्षा रक्षक याप्रकरणी गुन्हा दाखल करण्यासाठी पोलीस स्टेशनमध्ये दाखल झाला असून पुढील तपास सुरू आहे.
Video
View this post on Instagram
