नळदुर्ग – नळदुर्ग पोलीस ठाणे हद्दीतील चिवरी शिवारात शेतात काम करण्यावरून झालेल्या वादातून एका युवकाला मारहाण करून जातीवाचक शिवीगाळ केल्याचा गंभीर प्रकार समोर आला आहे. या प्रकरणी दोघांविरुद्ध अनुसूचित जाती जमाती अत्याचार प्रतिबंधक (ॲट्रॉसिटी) कायद्यान्वये गुन्हा दाखल करण्यात आला आहे.
याबाबत सविस्तर माहिती अशी की, फिर्यादी नागेश खंडु गायकवाड (वय २१, रा. अणदुर ता. तुळजापूर जि. धाराशिव) यांनी नळदुर्ग पोलीस ठाण्यात तक्रार दिली आहे. १२ एप्रिल २०२५ रोजी सायंकाळी ४ वाजण्याच्या सुमारास चिवरी शिवारात रुबाब खुशालद्दीन शेख यांच्या शेतात ही घटना घडली.
फिर्यादी नागेश गायकवाड हे रुबाब शेख यांच्या शेतात काम करत असताना, आरोपी अकबर खुशालद्दीन शेख आणि सुलेमान अकबर शेख (दोघे रा. अणदुर) यांनी त्यांना ‘तु रुबाब शेख यांच्या शेतात कशाला काम करतोस? माझ्या शेतात काम कर’ असे म्हणून अडवले. याचवेळी आरोपींनी नागेश गायकवाड यांना उद्देशून जातीवाचक शिवीगाळ करण्यास सुरुवात केली.
जातीवाचक शिवीगाळ करून थांबले नाहीत, तर आरोपींनी नागेश गायकवाड यांना लाथाबुक्यांनी आणि खोऱ्याच्या दांड्याने निर्घृण मारहाण केली. या मारहाणीत नागेश गायकवाड जखमी झाले आहेत. तसेच आरोपींनी त्यांना ‘तुला जिवे ठार मारू’ अशी धमकीही दिली असल्याचे फिर्यादीत म्हटले आहे.
या घटनेनंतर नागेश गायकवाड यांनी १९ एप्रिल २०२५ रोजी नळदुर्ग पोलीस ठाण्यात येऊन घडलेला प्रकार सांगितला व तक्रार दाखल केली. त्यांच्या फिर्यादीवरून नळदुर्ग पोलिसांनी आरोपी नामे-अकबर खुशालद्दीन शेख आणि सुलेमान अकबर शेख यांच्याविरुद्ध भारतीय न्याय संहिता कलम ११८(१), ११५(२), ३५२, ३५१(२) आणि अनुसूचित जाती जमाती अत्याचार प्रतिबंधक कायदा कलम ३(५) सह ३(१)(आर), ३(१)(आय) अन्वये गुन्हा नोंदवला आहे. या प्रकरणाचा अधिक तपास नळदुर्ग पोलीस करत आहेत.
