नळदुर्ग – ‘तुमच्या वडिलांमुळे आमची पॉवर प्लांटमधील नोकरी गेली’ या कारणावरून एकाच कुटुंबातील सहा जणांनी मिळून एका तरुणाला व त्याच्या कुटुंबीयांना शिवीगाळ करत लोखंडी रॉड व काठीने मारहाण करून जखमी केल्याची घटना तुळजापूर तालुक्यातील आरळी बुद्रुक येथे घडली आहे. याप्रकरणी नळदुर्ग पोलीस ठाण्यात सहा जणांविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी अविनाश भास्कर सलगर (वय २२ वर्षे, रा. आरळी बु., ता. तुळजापूर, जि. धाराशिव) याने दिलेल्या तक्रारीनुसार, ही घटना २० एप्रिल २०२५ रोजी सकाळी ९:०० ते ९:३० च्या दरम्यान आरळी बुद्रुक गावात घडली. आरोपी किरण उद्धव गिड्डे, राहुल किरण गिड्डे, रोहन किरण गिड्डे, अनिता किरण गिड्डे, सौदागर भीमराव गिड्डे आणि उत्तम नागनाथ गिड्डे (सर्व रा. आरळी बु., ता. तुळजापूर) यांनी फिर्यादी अविनाश यास अडवले.
‘तुझ्या वडिलांच्या सांगण्यावरून आम्हाला पॉवर प्लांटच्या कामावरून काढून टाकले आहे,’ असे म्हणत आरोपींनी अविनाशला शिवीगाळ केली. त्यानंतर लाथाबुक्क्यांनी, लोखंडी रॉड व काठीने मारहाण करून जखमी केले. इतकेच नाही, तर आरोपींनी फिर्यादी अविनाशच्या आई, वडील आणि भावाला देखील शिवीगाळ करत मारहाण केली आणि जीवे ठार मारण्याची धमकी दिली.
या घटनेप्रकरणी अविनाश सलगर यांनी २४ एप्रिल २०२५ रोजी नळदुर्ग पोलीस ठाण्यात फिर्याद दिली. या फिर्यादीवरून पोलिसांनी नमूद सहा आरोपींविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२), १८९(२), १९१(२), १९१(३) अन्वये गुन्हा नोंदवला आहे. पुढील तपास नळदुर्ग पोलीस करत आहेत.
