धाराशिव – धाराशिव तालुक्यातील करजखेडा येथे कोर्टात झालेली तडजोड मान्य नसल्याच्या कारणावरून एकाच कुटुंबातील नऊ जणांनी मिळून एका व्यक्तीला रस्त्यात अडवून काठी आणि लोखंडी रॉडने जबर मारहाण केल्याची घटना घडली आहे. या हल्ल्यात फिर्यादीसह भांडण सोडवण्यासाठी आलेले साक्षीदारही जखमी झाले आहेत. याप्रकरणी बेंबळी पोलीस ठाण्यात नऊ जणांविरुद्ध गुन्हा दाखल करण्यात आला आहे.
बालाजी मधुकर लोखंडे (वय ४९ वर्षे, रा. करजखेडा, ता. जि. धाराशिव) यांनी २८ एप्रिल रोजी बेंबळी पोलीस ठाण्यात फिर्याद दिली आहे. त्यानुसार, २२ एप्रिल रोजी रात्री ८ वाजण्याच्या सुमारास करजखेडा चौरस्ता येथे आरोपी बापुराव महादेव उर्फ बाबासाहेब लोखंडे, दत्तात्रय सुरेश लोखंडे, महादेव नरहरी लोखंडे, सुरेश नरहरी लोखंडे, सुनिता महादेव लोखंडे, सोमनाथ महादेव लोखंडे, कमलाबाई सुरेश लोखंडे, पल्लवी दत्तात्रय लोखंडे, आणि द्रोपदी नरहरी लोखंडे (सर्व रा. करजखेडा) यांनी गैरकायद्याची मंडळी जमवली.
‘कोर्टात झालेली तडजोड आम्हाला मान्य नाही’ असे म्हणत आरोपींनी बालाजी लोखंडे यांना रस्त्यात अडवून शिवीगाळ केली. तसेच त्यांना लाथाबुक्क्यांनी, काठीने आणि लोखंडी रॉडने मारहाण करून जखमी केले. हे भांडण सुरू असताना काही साक्षीदार ते सोडवण्यासाठी पुढे आले असता, आरोपींनी त्यांनाही मारहाण करून जखमी केले. शिवाय, आरोपींनी बालाजी लोखंडे आणि साक्षीदारांना जीवे ठार मारण्याची धमकी दिली, असे फिर्यादीत नमूद करण्यात आले आहे.
या तक्रारीवरून बेंबळी पोलिसांनी नऊ आरोपींविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५२, ३५१(२)(३), १८९(२), १९१(२), १९१(३), १९०(१), १२६(२) अन्वये गुन्हा नोंदवला आहे. पोलीस पुढील तपास करत आहेत.
