मंडळी, धाराशिवच्या राजकीय नाटकात आता एक नवा ट्विस्ट आला आहे! मागच्या भागात आपण आमदार महोदयांच्या ‘डिजिटल विकासा’ची झलक बघितली. आता जरा त्यांच्या ‘टेक्निकल’ स्वप्नांकडे वळूया. कारण काय आहे, राव? तर म्हणे, आता धाराशिवच्या कौडगाव एमआयडीसीमध्ये ‘लेदर’ नाही, तर चक्क ‘टेक्निकल टेक्स्टाईल पार्क’ होणार!
आता हे ‘टेक्निकल टेक्स्टाईल’ काय प्रकरण आहे, हे गुगलला विचारून पण लवकर कळणार नाही. पण असू द्या. आपल्या आमदारांना नवीन काहीतरी ‘टेक्निकल’ बोलायला मिळालं, यातच कार्यकर्त्यांचा आनंद! दहा वर्षांपूर्वी याच जागेवर भव्य लेदर पार्कची स्वप्नं दाखवली गेली होती. इटलीचे दौरे झाले, फोटोसेशन झाले, मोठमोठ्या गप्पा झाल्या. पण झालं काय? ‘इटली गेली आणि लिंबू पण गेले!’ आता तिथे फक्त काटेरी झुडपं आणि मोकाट गुरं चरताना दिसतात.
आता पुन्हा एकदा ‘घोषणा-मंत्र’ सुरू झाला आहे. ‘कौडगाव एमआयडीसीत लवकरच टेक्निकल टेक्स्टाईल पार्क उभारणार… हजारो तरुणांना रोजगार मिळणार…’ वगैरे वगैरे. कार्यकर्ते पण बिचारे काय करणार? ‘साहेब बोलले म्हणजे खरं!’ म्हणून उत्साहाच्या पोस्ट टाकून व्हाट्सअप ग्रुप्स फुल करत आहेत.
पण गंमत बघा! ज्या अमरावती शहरात असाच ‘टेक्निकल टेक्स्टाईल पार्क’ सुरू झाला आहे, तिथे म्हणे उद्योगपती ढुंकूनही बघायला तयार नाहीत! आता सांगा, जिथे तयार माल विकायला मार्केट नाही, पाणी-वीज आणि इतर सुविधांचा पत्ता नाही, तिथे हे मोठे उद्योगवाले का येतील? त्यांना काय स्वप्न पडली आहेत की धाराशिवच्या माळरानावर येऊन कारखाना थाटावा?
आणि आपले आमदारसाहेब? त्यांची तर भारीच ‘टेक्निकल’ स्ट्रॅटेजी आहे! निवडणुकीच्या तोंडावर एक पत्रकार परिषद घ्यायची, हातात एखादा फाईलचा गठ्ठा दाखवायचा आणि सांगायचं, ‘बघा, मी किती काम करतोय!’ मग काय, दोन-चार दिवस बातम्या चालणार, कार्यकर्त्यांना विषय मिळणार आणि मतदार पुन्हा एकदा ‘आशाळभूतपणे’ त्यांच्याकडे बघणार!
खरं तर, आता लोकांना या घोषणांचा इतका कंटाळा आला आहे की, कुणीतरी जर ‘पार्क’ हा शब्द जरी उच्चारला, तरी लोक विचारतात, ‘हा पार्क बघायला जायचं कुठे? प्राणीसंग्रहालयात की भाजी मार्केटमध्ये?’
आता सरकारला पण प्रश्न पडला असेल की, हे आमदार नक्की काय चालवलंय? दहा वर्षांपूर्वी लेदर पार्क, आता टेक्निकल टेक्स्टाईल पार्क… पुढच्या निवडणुकीत हे ‘नॉन-टेक्निकल’ लोकांना ‘क्वांटम फिजिक्स पार्क’चं स्वप्न दाखवणार की काय?
धाराशिवकरांना तर आता फक्त एकच प्रश्न पडला आहे – ‘हे टेक्निकल टेक्स्टाईल पार्क खरंच होणार की फक्त आमच्या डोक्याला ‘टेक्निकल प्रॉब्लेम’ येणार?’ कारण अनुभवावरून तर असंच वाटतंय की, पुढची दहा वर्षं पण याच घोषणांच्या ‘डिजिटल प्रिंट’मध्येच निघून जाणार! आणि कौडगावची एमआयडीसी? ती तर ‘जैसे थे’च राहणार… फक्त गवताची उंची आणखी वाढलेली असेल!
म्हणूनच म्हणतो, मित्रांनो, या ‘टेक्निकल’ घोषणांवर जास्त विश्वास ठेवू नका. कारण इथे ‘टेक्निक’ फक्त मतं मागण्याची आहे, विकास करण्याची नाही! आता बघूया, या ‘टेक्निकल’ नाटकाचा पुढचा अंक काय असतो! कदाचित त्यात ‘नॅनो टेक्नॉलॉजी पार्क’ची एंट्री पण होऊ शकते! तयार राहा!
