परांडा : तालुक्यातील रोसा फाटा येथे जुन्या भांडणाच्या कारणावरून एका तरुणावर आठ जणांच्या टोळक्याने जीवघेणा हल्ला केल्याची धक्कादायक घटना घडली आहे. महादेव संतोष नलवडे (रा. रोसा, ता. परंडा) असे जखमी तरुणाचे नाव असून, त्यांच्यावर सिमाई हॉटेलजवळ हल्ला करण्यात आला. ही घटना काल, शुक्रवार, दि. ०९ मे २०२५ रोजी दुपारी दीड वाजेच्या सुमारास घडली. याप्रकरणी परंडा पोलीस ठाण्यात आठ आरोपींविरुद्ध गंभीर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी महादेव नलवडे हे रोसा फाट्यावरील सिमाई हॉटेल परिसरात असताना, आरोपी भिमराव जगताप, बब्रुवान जगताप, वैभव जगताप, सचिन जगताप, लक्ष्मण जगताप आणि इतर तीन अनोळखी इसम (सर्व रा. रोसा, ता. परंडा) यांनी संगनमत करून गैरकायद्याची मंडळी जमवली. मागील भांडणाचा राग मनात धरून या सर्वांनी महादेव नलवडे यांना शिवीगाळ करत लाथाबुक्क्यांनी, लोखंडी पाईप, दगड, तलवार आणि चाकूने बेदम मारहाण केली. यामध्ये नलवडे हे जखमी झाले असून, आरोपींनी त्यांना जीवे ठार मारण्याची धमकीही दिली.
घटनेनंतर महादेव नलवडे यांनी तात्काळ परंडा पोलीस ठाण्यात धाव घेऊन फिर्याद दिली. त्यांच्या तक्रारीवरून पोलिसांनी आरोपींविरुद्ध भारतीय न्याय संहिता (भा.न्या.सं.) कलम ११८(१) (दुखापत करणे), ११५(२) (गंभीर दुखापत करणे), १८९(२) (गैरकायदेशीर जमावाचा सदस्य असणे), १९१(२) व १९१(३) (दंगल करणे), १९० (गैरकायदेशीर जमावासाठी शिक्षा), ३५२ (धमकी देणे), ३५१(२) व ३५१(३) (हल्ला किंवा फौजदारीपात्र बलप्रयोग) तसेच भारतीय हत्यार कायदा कलम ४ आणि २५ अन्वये गुन्हा नोंदवला आहे.
या हल्ल्यामुळे रोसा परिसरात तणावाचे वातावरण निर्माण झाले आहे. परंडा पोलीस आरोपींचा शोध घेत असून, पुढील तपास सुरू आहे.
