धाराशिव: मे महिना म्हटलं की रखरखतं ऊन आणि चाळिशी पार केलेला पारा, हेच चित्र दरवर्षी ठरलेलं. पण यावर्षी मात्र धाराशिव जिल्ह्यावर वरुणराजा काही भलत्याच प्रेमात पडलाय असं दिसतंय! गेल्या आठवड्याभरापासून जिल्ह्यात उन्हाळ्याऐवजी चक्क पावसाळ्याचे दृष्य अनुभवायला मिळत आहे. आणि तोही असा तसा नाही, तर थेट २५ वर्षांचे सगळे रेकॉर्ड धुऊन काढणारा! होय, ऐकून धक्का बसेल पण हवामान खात्यानं जिथे केवळ २२ मिलीमीटर पावसाचा अंदाज वर्तवला होता, तिथे प्रत्यक्षात तब्बल २७२ मिलीमीटर पाऊस कोसळला आहे – म्हणजे अंदाजापेक्षा जवळपास बारा पटींहून अधिक! तर काही आकडेवारीनुसार अपेक्षित पावसाच्या सातपट अधिक पावसाची नोंद झाली आहे. एकूणच काय, तर निसर्गाचा हा ‘हट के’ मूड सध्या धाराशिवकरांसाठी चर्चेचा विषय बनला आहे.
विक्रमी पावसाची ‘अतिवृष्टी’!
जिल्ह्यात २६ मे पर्यंत सरासरी २४२ मिलीमीटर पावसाची नोंद झाली आहे. गेल्या २५ वर्षांतील हा उच्चांकी पाऊस असल्याचं सांगितलं जातंय. या अनपेक्षित पावसामुळे शेतशिवारं पाण्याखाली गेली असून, ओढे-नाले दुथडी भरून वाहत आहेत. जणू काही पावसाळाच सुरू झालाय! इतकंच नव्हे तर जिल्ह्यातील सात महसूल मंडळांमध्ये पाच दिवसांपूर्वी ‘अतिवृष्टी’ झाल्याचीही नोंद करण्यात आली आहे. मे महिन्यातले तब्बल १२ दिवस ‘रेनी डे’ ठरले असून, अपेक्षित २५.१ मिमीच्या तुलनेत ५६७ टक्क्यांनी म्हणजे १४२.८ मिमी पाऊस काही भागांत नोंदवला गेला आहे.
तापमानाला ब्रेक, वातावरणात गारवा!
एरवी मे महिन्यात अंगाची लाहीलाही करणाऱ्या उन्हाच्या जागी आता हवेत सुखद गारवा आला आहे. पारा चाळिशीच्या पुढे सरकण्याऐवजी खाली आला आहे. त्यामुळे नागरिकांना उकाड्यापासून दिलासा मिळाला असला तरी, या अवकाळी पावसाने शेतीच्या कामांचं वेळापत्रक मात्र कोलमडून टाकलं आहे.
का होतोय हा ‘बिनमौसम बरसात’?
हवामान तज्ज्ञांच्या मते, अरबी समुद्रात तयार झालेला कमी दाबाचा पट्टा आणि बंगालच्या उपसागरात निर्माण झालेल्या चक्रीवादळाच्या स्थितीमुळे मोठ्या प्रमाणात बाष्प तयार झाले. याच बाष्पामुळे मे महिन्यात हा जोरदार मान्सूनपूर्व पाऊस बरसत आहे.
हवामान खात्याचा अंदाज आहे की, जिल्ह्यात ३० मे पर्यंत पावसाचा जोर कायम राहू शकतो. एकीकडे केरळात २००९ नंतर मान्सून दाखल झाला असून कोकण किनारपट्टीवरही त्याचं आगमन झालं आहे. त्यामुळे वातावरणातील हे बदल आगामी काळात काय रंगत आणणार, याकडे सगळ्यांचंच लक्ष लागून राहिलं आहे.
थोडक्यात काय, तर धाराशिव जिल्ह्यानं यंदा उन्हाळ्यातच पावसाळ्याची ‘ट्रेलर’वजा ‘हट के’ झलक अनुभवली आहे, जी दीर्घकाळ स्मरणात राहील!
