येरमाळा: येथील छत्रपती संभाजी नगर परिसरातील एका पत्र्याच्या शेडमध्ये गांजा विक्री करणाऱ्या एका इसमास, येरमाळा पोलिसांनी गुप्त माहितीच्या आधारे रंगेहाथ पकडले आहे. विजय अशोक शिंदे (वय २९) असे आरोपीचे नाव असून, त्याच्याकडून २०,००० रुपये किमतीचा ८५० ग्रॅम गांजा जप्त करण्यात आला आहे. ही कारवाई शुक्रवारी, दिनांक ३० मे २०२५ रोजी करण्यात आली.
पोलिसांनी दिलेल्या माहितीनुसार, पोलीस उपनिरीक्षक देविदास आवारे आणि त्यांचे पथक अवैध धंद्यांवर कारवाई करण्यासाठी गस्तीवर होते. त्यावेळी त्यांना छत्रपती संभाजी नगर येथील एका पत्र्याच्या शेडमध्ये एक इसम गांजाच्या पुड्या विकत असल्याची गोपनीय माहिती मिळाली. मिळालेल्या माहितीच्या आधारे पोलिसांनी तात्काळ घटनास्थळी जाऊन छापा टाकला असता, आरोपी विजय शिंदे हा गांजाची विक्री करताना आढळून आला.
सपोनि भालेराव यांच्या मार्गदर्शनाखाली पथकाने कायदेशीर प्रक्रिया पूर्ण केली. दोन शासकीय पंचांना बोलावून, आरोपीला त्याच्या कायदेशीर हक्कांची माहिती देण्यात आली. आरोपीच्या संमतीनंतर घेण्यात आलेल्या झडतीमध्ये, एका पांढऱ्या रंगाच्या कॅरीबॅगमध्ये उग्र वास असलेला, सुकलेला आणि ओल्या पाल्याच्या स्वरूपातील गांजा आढळून आला. त्याचे वजन केले असता ते ८५० ग्रॅम भरले, ज्याची अंदाजे किंमत २०,००० रुपये आहे.
पोलिसांनी गांजा जप्त करून, त्यातून प्रत्येकी २५ ग्रॅमचे दोन नमुने विश्लेषणासाठी काढून सीलबंद केले आहेत. उर्वरित ८०० ग्रॅम गांजा देखील जप्त करून सील करण्यात आला आहे.आरोपी विजय शिंदे हा अपंग असल्याने आणि या गुन्ह्यात एक वर्षापर्यंतच्या शिक्षेची तरतूद असल्याने, कायदेशीर सल्ला घेऊन त्याला तपासकामी हजर राहण्याबाबत नोटीस देऊन सोडण्यात आले आहे.
आरोपीविरुद्ध गुंगीकारक औषधी द्रव्य आणि मनोव्यापारावर परिणाम करणारे पदार्थ अधिनियम, १९८५ च्या कलम २०(ब)IIB आणि ८(क) अंतर्गत गुन्हा दाखल करण्यात आला आहे. प्रकरणाचा पुढील तपास पोलीस उपनिरीक्षक विलास जाधव करत आहेत.
