तुळजापूर – तुळजापूर शहरात वेगवेगळ्या घटनांमध्ये गांजा या अमली पदार्थाचे सेवन करणाऱ्या दोघांना तुळजापूर पोलिसांनी रंगेहाथ पकडले आहे. त्यांच्यावर एन.डी.पी.एस कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, शुक्रवार, दिनांक ३० मे २०२५ रोजी रात्री ८:३० वाजण्याच्या सुमारास, तुळजापूर शहरातील एका बंद पडलेल्या शासकीय गोदामाच्या आडोशाला मल्लिनाथ रघुनाथ हजारे (वय ३०, रा. मंगरुळ, ता. तुळजापूर) हा चिलीममध्ये गांजा भरून सेवन करत असताना पोलिसांना आढळून आला.
त्यानंतर, त्याच दिवशी रात्री ९:३० वाजण्याच्या सुमारास, त्याच ठिकाणी अजय राजेंद्र बनसोडे (वय २७, रा. मातंग नगर, शुक्रवार पेठ, तुळजापूर) हा देखील गांजाचे सेवन करताना पोलिसांच्या निदर्शनास आला.
या दोन्ही प्रकरणांमध्ये, तुळजापूर पोलिसांनी स्वतः सरकारतर्फे फिर्याद दिली असून, आरोपी मल्लिनाथ हजारे आणि अजय बनसोडे यांच्या विरोधात अमली पदार्थ विरोधी कायदा (एन.डी.पी.एस अॅक्ट १९८५) कलम २७ अन्वये स्वतंत्र दोन गुन्हे दाखल केले आहेत. या घटनेमुळे शहरात खळबळ उडाली असून, पोलीस पुढील तपास करत आहेत.
