कळंब : तालुक्यातील नायगाव येथील रायगव्हाण मध्यम तलावावर पाण्याची मोटार बसवण्याच्या कारणावरून झालेल्या वादात एका ५५ वर्षीय व्यक्तीला कत्तीने मारहाण करून जिवे मारण्याची धमकी दिल्याचा धक्कादायक प्रकार समोर आला आहे. विजय तुरतीरतन पुढाळे असे जखमी व्यक्तीचे नाव असून, त्यांच्या तक्रारीवरून रामलिंग भारत पुढाळे याच्याविरुद्ध शिराढोण पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना ९ मे २०२५ रोजी दुपारी साडेबाराच्या सुमारास घडली. फिर्यादी विजय पुढाळे हे रायगव्हाण तलावावर गेले असता, आरोपी रामलिंग पुढाळे याने त्यांना ‘तलावावर पाण्याची मोटार बसवायची नाही’ असे म्हणत शिवीगाळ करण्यास सुरुवात केली. वादाचे रूपांतर हाणामारीत झाले आणि आरोपीने फिर्यादीला लाथाबुक्यांनी व कत्तीने मारहाण करून जखमी केले. तसेच, जिवे ठार मारण्याची धमकीही दिली.
या घटनेनंतर जखमी विजय पुढाळे यांच्यावर उपचार सुरू होते. ५ जून २०२५ रोजी त्यांनी दिलेल्या वैद्यकीय जबाबावरून शिराढोण पोलिसांनी आरोपी रामलिंग पुढाळे याच्याविरुद्ध भारतीय न्याय संहितेच्या कलम ११८(१), ३५२, आणि ३५१(२) अन्वये गुन्हा नोंदवला आहे. पुढील तपास पोलीस करत आहेत.
