धाराशिव: जिल्ह्यात चोरट्यांनी पुन्हा एकदा डोके वर काढले असून, घरफोडी आणि वाहनचोरीच्या घटनांमध्ये वाढ झाली आहे. बेंबळी, मुरुम आणि धाराशिव शहर परिसरात झालेल्या वेगवेगळ्या घटनांमध्ये चोरट्यांनी लाखोंचा मुद्देमाल लंपास केला आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
केशेगावात कुटुंब झोपेत असताना घरफोडी
बेंबळी पोलीस ठाण्याच्या हद्दीतील केशगाव येथे एक धाडसी घरफोडीची घटना घडली आहे. सोमनाथ भिमराव वाघाळे (वय ५०) हे २१ मे २०२५ रोजी रात्री आपल्या कुटुंबासह घरात झोपले होते. पहाटे पावणेतीन ते तीन वाजण्याच्या सुमारास चोरट्याने घराच्या गेटचे कुलूप तोडून आत प्रवेश केला. त्यानंतर घरातील कपाटात ठेवलेले १७ ग्रॅम सोन्याचे दागिने, एक मोबाईल फोन आणि रोख रक्कम असा एकूण ६७,००० रुपयांचा ऐवज चोरून नेला. याप्रकरणी सोमनाथ वाघाळे यांनी १३ जून रोजी दिलेल्या फिर्यादीवरून बेंबळी पोलीस ठाण्यात सतिष कमलाकर गिरी (रा. विठ्ठलवाडी, ता. धाराशिव) याच्याविरोधात गुन्हा दाखल करण्यात आला आहे.
उमरगा आणि धाराशिव शहरातून दोन मोटारसायकली चोरीला
जिल्ह्यात वाहनचोरीच्या घटनाही वाढल्या आहेत. मुरुम पोलीस ठाण्याच्या हद्दीत भुयार चिंचोली येथील शुभम शाहुराज लोंढे (वय २३) यांची २५ हजार रुपये किमतीची हिरो एचएफ मोटारसायकल (क्र. एमएच २५ एयु ४०५९) १० जून रोजी दुपारी दोनच्या सुमारास रस्त्यावरून अज्ञात व्यक्तीने चोरून नेली.
दुसरी घटना धाराशिव शहरातील आनंदनगर पोलीस ठाण्याच्या हद्दीत घडली. भानुनगर येथील रहिवासी जितेंद्र पोपट नाईकवाडी (वय ४८) यांची ३० हजार रुपये किमतीची हिरो स्प्लेंडर मोटारसायकल (क्र. एमएच २५ झेड १२२०) २७ मे रोजी सायंकाळी पाच वाजता आरपी कॉलेजच्या गेटजवळून चोरीला गेली.
या दोन्ही वाहनचोरीच्या घटनांप्रकरणी पीडित मालकांनी १३ जून रोजी दिलेल्या तक्रारीवरून अनुक्रमे मुरुम आणि आनंदनगर पोलीस ठाण्यात अज्ञात आरोपींविरोधात गुन्हे नोंदवण्यात आले आहेत. पोलीस या सर्व प्रकरणांचा अधिक तपास करत आहेत.
