उमरगा : कसगी-तडोळा रस्त्यावर कत्तलीच्या उद्देशाने गोवंशीय जनावरांची निर्दयतेने वाहतूक करणाऱ्या दोघांना उमरगा पोलिसांनी रंगेहाथ पकडले आहे. त्यांच्या ताब्यातील वाहनातून तीन जर्सी गायी आणि दोन खोंड असे एकूण १ लाख ६ हजार रुपये किमतीचे पाच गोवंश वाचवण्यात आले आहेत.
याप्रकरणी वकील इमाम मुल्ला (वय ५२) आणि सोहेल जाकीर शेख (वय २२, दोघेही रा. बलसुर, ता. उमरगा) यांच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, मंगळवार, २४ जून रोजी दुपारी दीडच्या सुमारास उमरगा पोलिसांना गुप्त माहिती मिळाली की, एका वाहनातून गोवंशाची अवैध वाहतूक केली जात आहे. या माहितीच्या आधारे पोलिसांनी कसगी ते तडोळा जाणाऱ्या रस्त्यावर सापळा रचला. त्यावेळी अशोक लेलँड कंपनीच्या एमएच २५ एबी ०२९५ या क्रमांकाच्या वाहनाला थांबवून तपासणी केली असता, त्यात चारा-पाण्याची कोणतीही सोय न करता जनावरांना निर्दयतेने कोंबून भरल्याचे आढळून आले.
या वाहनातून तीन जर्सी गायी आणि दोन जर्सी खोंड यांची सुटका करण्यात आली. ही जनावरे कत्तलीसाठी नेण्यात येत असल्याचा संशय पोलिसांना आहे.
याप्रकरणी पोलिसांनी सरकारतर्फे फिर्याद देत दोन्ही आरोपींविरुद्ध प्राण्यांना क्रूरतेने वागवण्यास प्रतिबंध अधिनियम आणि प्राणी परिवहन अधिनियमातील संबंधित कलमांन्वये गुन्हा नोंदवला आहे. पुढील तपास उमरगा पोलीस करत आहेत.
