धाराशिव : गाडीला कट मारल्याच्या किरकोळ वादातून एका २६ वर्षीय तरुणावर लोखंडी कोयत्याने प्राणघातक हल्ला केल्याची धक्कादायक घटना धाराशिव शहरातील सरकारी दवाखान्याच्या आवारात घडली आहे. या हल्ल्यात हिमांशु व्यास हा तरुण गंभीर जखमी झाला असून, त्याला जीवे मारण्याची धमकीही देण्यात आली आहे.
याप्रकरणी धाराशिव शहर पोलिसांनी रोनीकेत उर्फ स्वप्नील बाबासाहेब राऊत आणि त्याच्या एका साथीदारावर गुन्हा दाखल केला आहे.
पोलिसांनी दिलेल्या माहितीनुसार, फिर्यादी हिमांशु सत्यनारायण व्यास (वय २६), जो मूळचा राजस्थानचा असून सध्या धाराशिवमध्ये राहतो, याला आरोपींनी २ ऑगस्ट रोजी रात्रीच्या सुमारास सरकारी दवाखान्याच्या परिसरात अडवले. ‘गाडीला कट का मारला’ या कारणावरून आरोपींनी हिमांशुसोबत वाद घालण्यास सुरुवात केली. हा वाद इतका विकोपाला गेला की, आरोपींनी हिमांशुला शिवीगाळ करत लाथाबुक्क्यांनी मारहाण केली.
त्यानंतर, जिवे ठार मारण्याच्या उद्देशाने आरोपींपैकी एकाने आपल्याजवळील लोखंडी कोयत्याने हिमांशुवर हल्ला करून त्याला गंभीर जखमी केले आणि घटनास्थळाहून पळ काढला.
या घटनेनंतर हिमांशु व्यास यांनी ३ ऑगस्ट रोजी धाराशिव शहर पोलीस ठाण्यात रीतसर तक्रार दाखल केली. त्यांच्या फिर्यादीवरून पोलिसांनी आरोपी रोनीकेत राऊत व त्याच्या साथीदाराविरोधात भारतीय न्याय संहितेनुसार प्राणघातक हल्ला (कलम 121(1)), गंभीर दुखापत (कलम 109), धमकी देणे (कलम 132), मारहाण (कलम 352) यांसारख्या गंभीर कलमांखाली गुन्हा नोंदवला आहे. तसेच, भारतीय हत्यार कायदा आणि महाराष्ट्र वैद्यकीय सेवा संस्था संरक्षण अधिनियमांतर्गतही गुन्हा दाखल करण्यात आला आहे.
शहराच्या मध्यवर्ती भागात आणि सरकारी दवाखान्यासारख्या संवेदनशील ठिकाणी झालेल्या या घटनेमुळे नागरिकांमध्ये भीतीचे वातावरण पसरले आहे. पोलीस आरोपींचा शोध घेत असून या प्रकरणाचा अधिक तपास करत आहेत.
