धाराशिव – धाराशिव जिल्ह्यात चोरट्यांनी पुन्हा एकदा डोके वर काढले असून, अवघ्या २४ तासांत वेगवेगळ्या ठिकाणांहून तीन मोटारसायकली आणि एक मोबाईल लंपास केल्याच्या घटना समोर आल्या आहेत. धाराशिव शहर, उमरगा आणि तुळजापूर तालुक्यात या चोऱ्या झाल्या असून, नागरिकांमध्ये भीतीचे वातावरण पसरले आहे. एका प्रकरणात पोलिसांनी तात्काळ कारवाई करत मोबाईल चोरणाऱ्या आरोपीला अटक केली आहे. विविध पोलीस ठाण्यात दाखल झालेल्या गुन्ह्यांनुसार, जिल्ह्यात एकाच दिवशी लाखोंचा मुद्देमाल चोरीला गेला आहे.
बीएसएनएल कार्यालयासमोरून युनिकॉर्न लंपास
धाराशिव शहरातील सांजा रोडवर असलेल्या बीएसएनएल कार्यालयासमोरून संदीप लक्ष्मण शिंदे (वय ३२, रा. शिंदेवाडी) यांची होंडा युनिकॉर्न मोटारसायकल (क्र. एमएच २५ बी.डी. २४४४) चोरीला गेली. ११ ऑगस्ट रोजी रात्री ८:३० ते ९:१५ च्या दरम्यान ही घटना घडली. अंदाजे ५०,००० रुपये किमतीची ही मोटरसायकल अज्ञात चोराने चोरून नेल्याची तक्रार संदीप शिंदे यांनी १२ ऑगस्ट रोजी आनंदनगर पोलीस ठाण्यात दिली, ज्यावरून गुन्हा नोंदवण्यात आला आहे.
उमरग्यात घरासमोरून पल्सरची चोरी
उमरगा तालुक्यातील जकेकूर येथे वसीम जैनुद्दीन शेख (वय ३३) यांची बजाज पल्सर मोटारसायकल (क्र. एमएच २५ ए.आर. ९९५१) त्यांच्या घरासमोरूनच चोरीला गेली. १० ऑगस्टच्या रात्री ९ ते ११ ऑगस्टच्या पहाटे ५ वाजेच्या दरम्यान ही घटना घडली. या ४०,००० रुपये किमतीच्या मोटरसायकल चोरीप्रकरणी वसीम शेख यांनी दिलेल्या तक्रारीवरून उमरगा पोलीस ठाण्यात अज्ञाताविरोधात गुन्हा दाखल झाला आहे.
तुळजापुरातून स्प्लेंडर गायब
तिसरी घटना तुळजापूर शहरातील शुक्रवार पेठेत घडली. येथे राहणारे राजन रंगनाथ हंगरगेकर (वय ३५) यांची २०,००० रुपये किमतीची हिरो स्प्लेंडर मोटारसायकल (क्र. एमएच २५ एएक्स ४७२१) ११ ऑगस्ट रोजी पहाटे साडेतीनच्या सुमारास अज्ञात चोराने चोरून नेली. याप्रकरणी तुळजापूर पोलीस ठाण्यात गुन्हा दाखल करण्यात आला आहे.
महादेव मंदिरातून मोबाईल चोरणारा बीडचा आरोपी गजाआड
दरम्यान, धाराशिव शहर पोलिसांनी एका मोबाईल चोरीच्या गुन्ह्यात आरोपीला अटक करण्यात यश मिळवले आहे. वडगाव (सि) येथील महादेव मंदिरात दर्शनासाठी आलेल्या व्यंकट अंबादास पांढरे (वय ४३) यांचा १०,००० रुपये किमतीचा रिअलमी कंपनीचा मोबाईल गर्दीचा फायदा घेऊन चोरण्यात आला होता. पांढरे यांनी दिलेल्या माहितीच्या आधारे शहर पोलिसांनी तात्काळ तपास करत राजू लक्ष्मण कुसळकर (वय ३९, रा. नवले आश्रम शाळा, पेठबीड, जि. बीड) या संशयिताला ताब्यात घेतले. चौकशीदरम्यान त्याने गुन्हा केल्याची कबुली दिली असून, पोलीस पुढील तपास करत आहेत.
एकाच दिवशी झालेल्या या सलग चोऱ्यांमुळे नागरिकांमध्ये चिंतेचे वातावरण असून, चोरट्यांनी पोलिसांपुढे आव्हान उभे केले आहे.
