उमरगा – तालुक्यातील एका गावात १७ वर्षीय अल्पवयीन मुलीला लग्नाचे आमिष दाखवून तिच्यावर लैंगिक अत्याचार केल्याची धक्कादायक घटना उघडकीस आली आहे. याप्रकरणी पीडितेच्या आईने दिलेल्या तक्रारीवरून उमरगा पोलीस ठाण्यात एका तरुणाविरुद्ध भारतीय न्याय संहिता आणि पोक्सो कायद्यान्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, तालुक्यातील एका गावातील तरुणाने पीडित १७ वर्षीय मुलीला लग्नाचे आमिष दाखवले. त्यानंतर ११ नोव्हेंबर २०२४ रोजी त्याने तिच्यावर लैंगिक अत्याचार केला. इतकेच नाही, तर आरोपीने पीडितेस शिवीगाळ करून जीवे ठार मारण्याची धमकीही दिली, असे फिर्यादीत म्हटले आहे.
घडलेल्या प्रकारानंतर पीडितेच्या आईने १ सप्टेंबर २०२५ रोजी उमरगा पोलीस ठाण्यात धाव घेऊन तक्रार दाखल केली. त्यांच्या तक्रारीच्या आधारे पोलिसांनी आरोपी तरुणाविरुद्ध भारतीय न्याय संहिता कलम ४९, ६४, ६४(२), ६४(२)(एम), ३५१(३), ३५२ तसेच लैंगिक अपराधांपासून बालकांचे संरक्षण (पोक्सो) कायद्याच्या कलम ४, ८ आणि १२ अन्वये गुन्हा नोंदवला आहे. या घटनेमुळे तालुक्यात खळबळ उडाली असून, पोलीस प्रकरणाचा अधिक तपास करत आहेत.
