मंडळी, धाराशिवच्या ‘टुरिस्ट वाघोबा’ची गोष्ट तर तुम्हाला माहीत आहेच. यवतमाळहून ५०० किलोमीटरची सोलो ट्रिप मारून आलेला हा पठ्ठ्या, गेल्या आठ महिन्यांपासून जिल्ह्याचा जणू जावईच बनून राहिला आहे. त्याचा ‘फूड ब्लॉग’ अजूनही सुरूच असून, शंभराहून अधिक जनावरांच्या ‘डिशेस’वर त्याने ताव मारला आहे. पण आता या गोष्टीत नवे आणि रंजक ट्विस्ट आले आहेत!
आपल्याला आठवतंय, या महाशयांना पकडण्यासाठी आधी ताडोबाची ‘स्पेशालिस्ट’ टीम आली आणि २५ दिवसांची ‘जंगल सफारी’ करून परत गेली. त्यानंतर पुण्याची ‘हाय-टेक’ टीम आली, पण महिनाभर शोध घेऊनही वाघोबाने त्यांना गुंगारा दिला. तो ‘आज येथे, उद्या तेथे’ करत येडशी, बार्शी, भूम फिरतच राहिला.
आणि आज, ४ सप्टेंबर! वाघोबांनी वरवंटी शिवारात शेतकऱ्यांना ‘स्पेशल दर्शन’ दिले. शेतकरी घाबरले, पण कुठेतरी त्यांनाही आता सवय झाली असावी. “आले का पाव्हणे?” असं म्हणत त्यांनी वन विभागाला फोन लावला. वन विभागाची गाडी सायरन वाजवत पोहोचतेय, तोपर्यंत पठ्ठ्याने कामठा, कात्री, आपसिंगा असा पुढचा दौरा सुरू केला होता.वन विभागाचे कर्मचारी आता डायरीत रोज एकच नोंद करत असतील, “वाघोबा पुन्हा दिसले, आम्ही मागे पळालो, वाघ पुन्हा गायब!”
वन विभागाची ही सगळी धावपळ आणि वाघोबाचा ‘लपंडाव’ पाहून सोशल मीडियावर मात्र मीम्सचा पूर आला आहे. नेटकऱ्यांनी यावर एक भन्नाट आणि तितकाच विनोदी उपाय सुचवला आहे.
सध्या सोशल मीडियावर मेसेज फिरत आहेत की, “वन विभागाला आठ महिन्यांपासून वाघ सापडत नाहीये. कुणीतरी अंबानींना सांगा, ते एका दिवसात शोधून त्याला थेट जामनगरच्या ‘वनतारा’मध्ये स्पेशल ट्रीटमेंट द्यायला घेऊन जातील!”
हा मेसेज तुफान व्हायरल होत असून, लोक यावर भरपूर विनोद करत आहेत. थोडक्यात काय, तर धाराशिवचा हा वाघ आता फक्त जंगलाचा राजा राहिलेला नाही, तर सोशल मीडियाचाही ‘किंग’ बनला आहे. एका बाजूला महादेवी हत्तीची तयारी, तर दुसऱ्या बाजूला ‘वनतारा’चे मीम्स… या सगळ्या गदारोळात आमचा ‘अवतार’ वाघोबा मात्र कुठेतरी शांतपणे पुढच्या ‘डेस्टिनेशन’चा विचार करत असेल!
