धाराशिव – श्री गणेश विसर्जन आणि ईद-ए-मिलाद सण एकाच वेळी आल्याने कायदा व सुव्यवस्था अबाधित राखण्यासाठी धाराशिव जिल्ह्यातील मुस्लिम बांधवांनी सामाजिक सलोख्याचा आदर्श निर्माण केला आहे. गणेश विसर्जन मिरवणुकीच्या पार्श्वभूमीवर, मुस्लिम समाजाने स्वयंस्फूर्तीने ५ सप्टेंबर रोजी होणारी ईद-ए-मिलादची जुलूस मिरवणूक आता ८ सप्टेंबर रोजी काढण्याचा निर्णय घेतला आहे. या दोन्ही उत्सवांच्या निमित्ताने जिल्हा पोलीस दलाने संपूर्ण जिल्ह्यात कडेकोट बंदोबस्त तैनात केला आहे.
जिल्ह्यात २७ ऑगस्ट ते ६ सप्टेंबर या कालावधीत गणेशोत्सव साजरा होत असून, उद्या (दि. ६ सप्टेंबर) श्री गणेश विसर्जनाच्या मिरवणुका काढण्यात येणार आहेत. त्याचवेळी, ५ सप्टेंबर रोजी ईद-ए-मिलाद हा सण होता. दोन्ही उत्सव शांततेत आणि सौहार्दपूर्ण वातावरणात पार पडावेत, यासाठी प्रशासनाने केलेल्या आवाहनाला प्रतिसाद देत मुस्लिम समाजाने आपला सण पुढे ढकलण्याचा महत्त्वपूर्ण निर्णय घेतला, ज्याचे सर्वत्र कौतुक होत आहे.
पोलीस प्रशासन पूर्णपणे सज्ज
पोलीस अधीक्षक श्रीमती शफकत आमना यांनी दिलेल्या माहितीनुसार, दोन्ही उत्सवांच्या पार्श्वभूमीवर जिल्हा प्रशासन पूर्णपणे सज्ज आहे. पोलीस दलाने गणेश मंडळ पदाधिकारी, शांतता समिती आणि मोहल्ला समितीच्या बैठका घेऊन सर्वांना शांतता राखण्याचे आवाहन केले आहे.
असा आहे पोलीस बंदोबस्त:
- अधिकारी व अंमलदार: १२३ पोलीस अधिकारी आणि १,५६६ पोलीस अंमलदार.
- अतिरिक्त फौजफाटा: राज्य राखीव पोलीस दलाची (SRPF) १ प्लाटून आणि ७७० पुरुष व महिला गृहरक्षक दलाचे जवान.
- विशेष पथके: दंगल नियंत्रणची २ पथके आणि जलद प्रतिसाद (QRT) ची ३ पथके तैनात करण्यात आली आहेत.
याशिवाय, जिल्ह्यातील गुंड, उपद्रवी आणि समाजकंटकांवर प्रतिबंधात्मक कारवाई करण्यात आली असून, महाराष्ट्र पोलीस अधिनियमानुसार जिल्ह्यात जमावबंदी व शस्त्रबंदीचे आदेशही लागू करण्यात आले आहेत.
पोलिसांकडून नागरिकांना आवाहन
पोलीस अधीक्षक श्रीमती शफकत आमना यांनी नागरिकांना सण-उत्सव शांततेत पार पाडण्यासाठी सहकार्य करण्याचे आवाहन केले आहे. नागरिकांनी सोशल मीडियावरील अफवांवर विश्वास ठेवू नये, एकमेकांच्या धार्मिक भावनांचा आदर करावा, ध्वनीप्रदूषण टाळावे आणि प्रशासनाच्या निर्देशांचे पालन करावे, असे आवाहन पोलिसांनी केले आहे. आपत्कालीन वाहनांना अडथळा होऊ नये यासाठी रस्त्यावर मंडप उभारू नयेत तसेच गणेश विसर्जनाच्या मिरवणुका वेळेत पूर्ण कराव्यात, असेही स्पष्ट करण्यात आले आहे.
