उमरगा – उमरगा पोलिसांनी तालुक्यात प्रतिबंधित गुटखा विक्री करणाऱ्यांविरोधात कारवाईचा बडगा उगारला असून, मंगळवारी (दि. ३० सप्टेंबर) दोन वेगवेगळ्या ठिकाणी छापे टाकून दोघांना ताब्यात घेतले आहे. या कारवाईत एकूण २२,५६० रुपयांचा प्रतिबंधित गुटखा आणि तंबाखूजन्य पदार्थांचा साठा जप्त करण्यात आला आहे.
पोलिसांनी दिलेल्या माहितीनुसार, पहिली कारवाई तालुक्यातील कदेर येथील साठे चौकात करण्यात आली. येथील मुस्कान किराणा दुकानात युसुफ करीमशा मकानदार (वय ५२, रा. कदेर) हा प्रतिबंधित गुटख्याची विक्री करत असल्याची माहिती पोलिसांना मिळाली होती. त्यानुसार, पोलिसांनी सायंकाळी ६ वाजून ४५ मिनिटांच्या सुमारास छापा टाकला असता, दुकानातून विमल पान मसाला, व्ही-एक टोबॅको आणि वजीर गुटखा असा एकूण १७,८५० रुपये किमतीचा मुद्देमाल आढळून आला.
दुसरी कारवाई गुंजोटी येथे करण्यात आली. येथील संदीप किराणा दुकानात प्रविण शिवानंद देशमुख (वय ३३, रा. गुंजोटी) हा शासनाने प्रतिबंध लावलेल्या गुटख्याची विक्री करत होता. पोलिसांनी सायंकाळी ६ वाजून ४० मिनिटांच्या सुमारास केलेल्या कारवाईत त्याच्याकडून विमल पान मसाला आणि व्ही-एक टोबॅको तंबाखूच्या पुड्या असा एकूण ४,७१० रुपयांचा माल जप्त करण्यात आला.
या दोन्ही प्रकरणी उमरगा पोलिसांनी मुद्देमाल जप्त करून दोन्ही आरोपींविरुद्ध भारतीय न्याय संहिता (भा.न्या.सं.) कलम १२३, २२३, २७५ आणि अन्न सुरक्षा व मानके कायद्याच्या कलम ५९ अन्वये गुन्हा नोंदवला आहे. या कारवाईमुळे तालुक्यातील अवैध गुटखा विक्रेत्यांमध्ये खळबळ उडाली आहे.
कोराळ येथे घरासमोरील शेडमधून गुटखा विक्री; मुरुम पोलिसांच्या कारवाईत १० हजारांचा मुद्देमाल जप्त
मुरुम – शासनाने प्रतिबंधित केलेल्या गुटख्याची चोरटी विक्री करणाऱ्यांविरोधात मुरुम पोलिसांनी कारवाई केली आहे. उमरगा तालुक्यातील कोराळ येथे राहत्या घरासमोरील पत्र्याच्या शेडमधून गुटखा विक्री करणाऱ्या एका व्यक्तीवर छापा टाकून पोलिसांनी १०,४७० रुपये किमतीचा मुद्देमाल जप्त केला आहे.
याप्रकरणी भगवान भानुदास सगर (वय ४१ वर्षे, रा. कोराळ) असे गुन्हा दाखल झालेल्या आरोपीचे नाव आहे. पोलिसांनी दिलेल्या माहितीनुसार, मंगळवारी (दि. ३० सप्टेंबर) दुपारी दीड वाजण्याच्या सुमारास भगवान सगर हा आपल्या घरासमोरील शेडमध्ये प्रतिबंधित गुटखा व तंबाखूजन्य पदार्थांची विक्री करत असल्याची गोपनीय माहिती पोलिसांना मिळाली होती.
या माहितीच्या आधारे पोलिसांनी घटनास्थळी छापा टाकला असता, तिथे केसरयुक्त विमल पान मसाला आणि व्ही-एक कंपनीची तंबाखू असा एकूण १०,४७० रुपयांचा साठा विक्रीसाठी ठेवलेला आढळून आला. पोलिसांनी संपूर्ण मुद्देमाल जप्त केला आहे.
याप्रकरणी आरोपी भगवान सगर याच्याविरुद्ध मुरुम पोलीस ठाण्यात भारतीय न्याय संहिता (भा.न्या.सं.) कलम १२३, २२३, २७४, आणि २७५ अन्वये गुन्हा नोंदवण्यात आला असून, पोलीस पुढील तपास करत आहेत. या कारवाईमुळे परिसरातील अवैध गुटखा विक्रेत्यांमध्ये खळबळ उडाली आहे.
मोटारसायकलवरून गुटखा विक्री करणाऱ्या दोघांना अटक; शिराढोण पोलिसांच्या कारवाईत ६३ हजारांचा मुद्देमाल जप्त
शिराढोण – शासनाने प्रतिबंध घातलेल्या गुटख्याची मोटारसायकलवरून वाहतूक करून विक्री करणाऱ्या दोघांना शिराढोण पोलिसांनी रंगेहाथ पकडले आहे. मंगळवारी (दि. ३० सप्टेंबर) लातूर रोडवर केलेल्या या मोठ्या कारवाईत पोलिसांनी ६३,६४८ रुपये किमतीचा गुटखा आणि गुन्ह्यात वापरलेली मोटारसायकल जप्त केली आहे.
याप्रकरणी संदीप शाहुराव भिसे (वय ५६, रा. बाबानगर, कळंब) आणि सुदाम विठ्ठल शिंदे (रा. भोई गल्ली, कळंब) या दोघांना ताब्यात घेण्यात आले आहे. पोलिसांनी दिलेल्या माहितीनुसार, हे दोघे लातूर रोडवरील मधुबन हॉटेलजवळ मोटारसायकलवर गुटख्याचा साठा घेऊन विक्रीसाठी थांबले असल्याची गोपनीय माहिती पोलिसांना मिळाली होती.
त्यानुसार, पोलिसांनी सकाळी ११:२० ते १२:२० च्या सुमारास सापळा रचून छापा टाकला. यावेळी आरोपींची झडती घेतली असता, त्यांच्याकडे केसरयुक्त विमल पान मसाला, गोवा, राजनिवास सुगंधीत पानमसाला, जाफरानी जर्दा, वि-१ तंबाखू यांसारख्या विविध प्रकारच्या प्रतिबंधित पदार्थांचा मोठा साठा आढळून आला.
पोलिसांनी गुटख्याचा संपूर्ण साठा आणि गुन्ह्यासाठी वापरलेली मोटारसायकल असा एकूण ६३,६४८ रुपयांचा मुद्देमाल जप्त केला आहे. विशेष म्हणजे, शिराढोण पोलिसांनी ही कारवाई केली असली तरी, याप्रकरणी मुरुम पोलीस ठाण्यात गुन्हा नोंदवण्यात आला आहे. दोन्ही आरोपींविरुद्ध भारतीय न्याय संहिता (भा.न्या.सं.) कलम १२३, २२३, २७४, २७५, ३(५) आणि अन्न सुरक्षा व मानके कायद्याच्या कलम ५९ अन्वये गुन्हा दाखल करण्यात आला असून, पोलीस पुढील तपास करत आहेत.
