नळदुर्ग – तुळजापूर तालुक्यातील मानमोडी येथे पवनचक्कीच्या विद्युत खांबाच्या कामाबद्दल अधिकाऱ्याशी बोलल्याच्या क्षुल्लक कारणावरून एका ३० वर्षीय तरुणाला शिवीगाळ करत लाथाबुक्क्यांनी आणि सुरीने मारहाण केल्याची घटना उघडकीस आली आहे. पीडित तरुणाला जीवे मारण्याची धमकीही देण्यात आली.
याप्रकरणी पीडित तरुण रोहीत राजेंद्र गुंजकर (वय ३०, रा. मानमोडी) यांनी दिलेल्या फिर्यादीवरून नळदुर्ग पोलीस ठाण्यात एकाच कुटुंबातील चार जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना २८ सप्टेंबर २०२५ रोजी दुपारी दोन ते अडीच वाजण्याच्या सुमारास घडली. मानमोडी येथील रहिवासी असलेले आरोपी सुधाकर व्यंकट गुंजकर, ईश्वर व्यंकट गुंजकर, अनिता सुधाकर गुंजकर आणि आल्का ईश्वर गुंजकर यांनी रोहीत गुंजकर यांना “तू पवनचक्कीच्या विद्युत खांबाचे काम करणाऱ्या अधिकाऱ्याला का बोललास?” असे म्हणत जाब विचारला. यावरून वाद वाढला आणि आरोपींनी रोहीत यांना शिवीगाळ करत लाथाबुक्क्यांनी व सुरीने मारहाण करून जखमी केले. तसेच, जीवे ठार मारण्याची धमकी दिल्याचे फिर्यादीत म्हटले आहे.
या घटनेनंतर रोहीत गुंजकर यांनी ३० सप्टेंबर रोजी नळदुर्ग पोलीस ठाण्यात तक्रार दाखल केली. त्यांच्या तक्रारीवरून पोलिसांनी चारही आरोपींविरोधात भारतीय न्याय संहिता कलम ११८(१), ३३३, ११५(२), ३५२, ३५१(२), ३(५) अन्वये गुन्हा नोंदवला असून, घटनेचा पुढील तपास सुरू आहे.
